جتكو القرف .. مليتو البلد

حد يفكرني كده احنا في سنة كام
آه .. سنة 2011 و داخلين على 2012 أهو
يعني المفروض اننا جيل متحضر
جيل متطور و واعي و عنده مخ يفكر بيه
قبل ما يتصرف أي تصرف

بس للأسف لسه لحد دلوقتي
فيه امخاخ تعبانة و آكلها الدود
و طبعاً بتتقسّم لكذا فئة

بس أنا هامسك فئة معينة
مش عارفة لها كلمة أوصف بيها وصف صريح
بس ممكن نحطه تحت مسمى ساخر شوية
فاعل خير .. أو تائب عن المعاصي

خلّيني أتكلم عن التفاصيل

الموضوع هايكون بـ خصوص البنات
كلنا بما فيهم أنا , بنتعرّض لـ مضايقات من عيال سخيفة
و يؤسفني اني أقول كده عن الرجالة
لان الأشكال دي مالهاش غير انه يتقال عنهم كده

بس فيه نوعية كده متخصصة في المضايقة بالكلام
لا .. مش المعاكسات اللي في الشارع
ولا الجتت اللي بتترمى في الكليات
كل دول واضحين و متشافين
و دي حاجة كويسة عشان نعرف ناخد حقنا منهم

انما أنا قصدي على المتخفيّين الجبناء
عديمي الانسانية و الآخلاق و الرباية
بتوع التليفونات و الموبايلات و الرسايل
اللي بيستخبو ورا المسميات الساخرة اللي قولتها من شوية

و المشكلة كمان انه بيحط نفسه تحت مسمى
مالوش أي علاقة بتاتاً باللي بيعمله
و ده دليل على انه عنده انفصام في شخصيته

المتخلّفين دول بقى أكتر حاجة ممكن تضايق بجد
مش كلامهم ولا العبط اللي بيقولوه ده .. لأ
انهم ماعندهمش الشجاعة انهم يتكلمو وجهاً لوجه

و هاتجيلهم منين الشجاعة أساساً
و هما مالهمش أي حق انهم يتعرضو لأي بنت
لان ده على حد علمي اسمه تحرّش كلامي
و لو اتعرف ممكن جداً يتعمل له محضر سب و قذف

الطريف في الموضوع بقى
و اللي بيخلّيني اضحك جداً على الهبل بتاعهم
ان عقولهم سايحة منهم لدرجة انهم بيخافو يتكلمو
من أرقامهم أو من ايميلاتهم أو أكونتاتهم

يقوم الواحد من دول يكلّف نفسه و يجيب خط جديد
أو يعمل ايميل أو أكونت جديد غير بتاعه
و يبدأ يمارس خططه الدنيئة بمنتهى السفالة و قلة الحيا
و بعد ما ينجز المهمة يقفله , عشان محدش يجيبه أو يكلمه

الشخص اللي بيعمل كده
اعرفي على طول انه أول حاجة كذاب أو منافق
و تاني حاجة حيوان أو كلب شوارع
و بيقف يحط راسه في صناديق الزبالة
عشان يعرف يطلع كلام قذر زيه
و في الغالب بيكون كله كلام هجص
و مالوش أي أساس من الصحة

فـ ده مايستاهلش اننا نتهز بسببه
ده أخره يتساب كده يهبهب مع نفسه زي الكلاب
و لو شاء القدر انه يتعرف و يتقفش
لازم .. لازم .. يتعمل معاه السليمة

الغباء بقى , انه مش عارف انه مختل عقلياً
و المفروض يترمى في مصّحة مجانين
لـ كام سبب معروفين جداً
زي مثلاً : بيعمل الواجب لواحد صاحبه
و زي : مخنوق منِك عشان مصدّراله الوش الخشب
أو : انِك مهزّقاه و ماسحة بكرامته الأرض
و زي : مش عارف يطولك بالذوق يقوم يسوّأ سمعتك
اعتقاداً من عقله المريض ان كده عشان محدش يطولك خالص

المحزن في الموضوع بقى
ان منهم ناس كتيرة متعلمة و خريجي جامعات نضيفة
و كمااان ولاد ناس كويسين

بيجيبو قلة الأدب دي منين ॥ أنا مش فاهمة !

أنا عندي ليستة كاملة
فيها كمية شتايم و تهزيق و أمراض محترمة
بس أنا بصراحة مكسلة جداً أكتبها
فـ كفاية بيتهيألي اللي قولته

عندي كلمتين في الآخر محشورين في زوري
و ممكن تكون رسالة موجّهة و مقصودة
ياريت كل واحد يخلّيه في حاله أحسن
و يعرف كويس أوي انه مش هايستفيد أي حاجة
و ان اللي بيعمله هايطلع عليه في حد من بيته
كل واحد فينا عنده أمراضه النفسية
فـبلاش نقعد نحدّف بعض بأمراضنا

و حتة وطني بقى
عيب كده .. ده احنا حتى جيل الثورة
و مصر عشان تتغير لازم نتغير احنا الأول
فـ المفروض نساعدها يعني

آلاء حلمي

شحططة بـــعد التـــخرج ... ج2 ( خلصت وايدي على خدي )

وحشتوني أوي
معلش بقالي كتير مكتبتش ... كنت بخلص بقيت الشحططة عشان اجي احكيلكو بقا ...
كنا وقفنا ان فاضل الفيش العسكري ... رحت تاني يوم القسم وعملت الفيش وطلعت ختمتة من شيخ الحارة ومن المأمور ... الصدمة بقى ... روح اختمها من مديرية امن القاهرة ... الحمد لله بابا كان معايا خدنا العربية ورحنا على المديرية ختمناها ... وكان المفروض اطلع على الكشف يوم السبت ... بس كنا مسافرين مطروح يوم الجمعة والرجوع الجمعة ال بعدها ...
جينا الحمد لله ... طلعت تاني يوم على الكشف الطبي ... كان حتة يوووووووووووووووووووووم


السبت 20-8
نزلت من البيت الساعه 5 الصبح واحنا لسة جيين من السفر الجمعة ... المهم الحمد لله وصلت التجنيد الساعه 6 وتلت
كان فيه اتوبيسات بتدخلنا المنطقة المركزية ... ركبت الاتوبيس ... ووصلت الحمد لله
طبعا بعد معذبونا وطلعو عين ال جابونا كنت خلصت على الساعه 5 العصر وخدت لائق طبي ومستني بقى 110 جند عشان اجي اسمع الارجاء يوم الاربع
الشعب كلة خلص ومشي وانا ورقتي متعطلة متفهمش ليه 
فيييييين وفييييييييين لما طلعت الاستمارة بتاعتي ... الساعه 7 ونص ... كتر خير مصطفى مسعد كان معايا اليوم دة وفضل مستني معايا رغم انة مخلص الساعه 3 ونص وخد اعفاء كمان
نطلع من المركز نكتشف ان الاتوبيسات مش موجودة وعلينا ان نمشي هذا الطريق في عز الظلام ... اه والله في عز الظلام
الحمد لله على موصلنا للطريق كانت الساعه بقت 8 وربع وركبنا لموقف العاشر ومش فاكر حاجة بعد كدة :D


الاربعاء 24-8 
يوم الارجاء ... قلت مش رايح بدري المرادي رحت على الساعه 9 كدة .. فضلنا مستنيين لحد مبدأ يندهو التخصصات الحرجة الساعه 12 كدة
ال مش فاهم ايه الارجاء دي اانا اقولك ...
المفروض الجيش بيبقى عنده طلب على تخصصات معينة دي مينفعش يسيب اي حد منها ... بيتاخدو كلهم
الباقي بقى بيتاخد منهم ناس وناس تانية بتاخد تأجيل تلات سنين لان الجيش مش محتاجهم
والحكم في الموضوع دة تاريخ الميلاد
الجيش مثلا بيقول هناخد من مواليد يوم كذا لمواليد يوم كذا ... ومن كذا لكذا ... والباقي بياخدو تأجيل
المهم نهاية اليوم الحمد لله خدت تأجيل ... ومكنتش مصدق لان دي اخر حاجة كنت متوقعها ... انا كنت مجهز نفسي خلاص اني لابس لابس ... بس الحمد لله ... كنت فاكر ان مصر بتقولي شغلك اهم :D
خلصنا حوارات الجيش وطلعنا شهادة التخرج المؤقتة بعد عناء وقرف وبهدلة من الشؤون عندنا الله يهديهم
وننزل ميادين العمل بقى ال ايه فاكر ان مصر هتناديني اشتغل واننا هنتخطف
ونكتشف الصدمة ... السوق واقف ... المهندسين مش لاقيين شغل ... الشركات بتصفي ال عندها ... والحال بدل ميتعدل بعد الثورة ... مفيش شغل ...والفطاحل الشطار ال عرفو يشتغلو مننا بياخدو مرتبات كنا بناخدها لما كنا بننزل تدريب في الصيف واحنا طلبة مش مرتبات مهندسين ابدا
هو في ايه ... ايه ال حصل في البلد ... هنفضل كدة ولا ايه ... لااااا انا عايز اتجوز :(
اديني قاعد في البيت دلوقت ... ماسك الجرايد وهات يا تلفونات ... ونشوف شغل هنا وهناك
ادعولنا تتعدل يا اخوانا :(

محمود أنور

كل سنة و احنا بخير

بما ان الوحي صايم الأيام دي

و مانع عني أي إلهام عشان أعرف أكتب أي حاجة

قررت أفتكر حاجة حلوة في أيام كانت مهببة بالنسبالي

و أحكيلكو عليها ..

زي الأيام دي السنة اللي فاتت ..

بعد اتفاق بيني و بين صديقي الباشمهندس محمود

قررنا اننا نبدأ نكتب في مكان واحد مشترك

عن مواضيع قابلة للنقاش أو خواطر .. إلخ

في مدونة صغيرة على أدّنا كده

و بالفعل .. عملنا مدونة

بعد محايلة من أختي باقناعي بالموضوع ده

و تشجيع كبير من محمود

و انطلقت مدونة ولد و بنت

لتكون ميلاد اتنين جداد في عالم التدوين

و بدأنا نتكلم في أغلب المجالات

سياسي و رياضي و اجتماعي و فني ..

و بعد ما لقينا قبول من الناس على المواضيع

و إللي كان بيخلّيني نسبياً أتحسن نفسياً

بسبب اعجاب الناس بـ حاجة بنعملها

فجأة .. اختفينا و بطلنا نكتب ..

بسبب انشغالنا في الدراسة و غيره

بس آدينا أهو .. رجعنا تاني

و انهاردة أحب أقول لبنتنا المدونة : كل سنة وانتي طيبة

عشان كلمت سنة تقريباً

و كل سنة و محمود كويس و مبسوط مع مراته

و كل سنة و اختي كويسة بـ مناسبة عيد ميلادها

و كل سنة و أنا كويسة بين صحابي الكويسين

و كل سنة و كل الناس بـ خير و مبسوطين

آلاء حلمي

شحططة بـــعد التـــخرج ... ج1

ازيكووو ... ؟؟
عاملين ايه ..؟؟
وحشتوني اوي ... بقالي كتيييييير مكتبتش .... من امتحانات الترم الاولاني
صحيح هيييييييه اخيرا اتخرجت ... وكتبنا الكتاب وعلينا الجواب ... يللا عقبالكم جميعا
الدنيا دي بتجري بسرعه اوي ... فجأة قامت الثورة ... فجأة مبارك مشي ...فجأة المجلس العسكري بقى حامي الثورة ... فجأة مصر بقت متقسمة وبقى في احزاب واخواني ولبرالي وسلفي ويساري وجنوبي وبطيخي .... فجأة امتحنا ... فجأة زنقونا في المشروع ... هوبااا اتخرجت ... ياخبر بقيت مهندس ... فجأة ودعت العزوبية ... وبقيت مسئووووووو....... 
.
.
.
.
.
.
.
.
.
عشان كلمة واحدة بتفرق كتير ... بيبسي وفودافون ادولك 10 دقايق في كل ازازة .... تييييييييييييييت
يللا مهي ناقصة ذل :@


المهم بدأنا مشاوير الجيش ... حاجة اخر قرف ... احنا نخلص يوم 27 ويقولك اخر معاد للكشف يوم 3 في الشهر ال بعده
طب ازااااي النتيجة لسة مطلعتش ... من اولها هرتلة ... وتجررري تخلص ورقك تروح القسم يقولك الفيش هياخد اسبوع على ميطلع لو مستعجل روح العباسية ... وتطييير على العباسية ... يااااااااااااخبر هي مصر كلها جية تعمل فيش ولا ايه ... كل دي بشر ... طابوووور طويييييييل قدام الادلة الجنائية ... وقفت في الطابور لحد متوصل للباب ... الحمد لله ادوني ورقة فيها رقم (1050) ... مبصتش في الرقم ... دخلت جوة لقيت طابوووور طوووووووويييييييل تاني ... أم البلد بتاعه الطوابير دي ... تقف ... تسجل اسمك ... روح عند التفييش بقى ورا المبنى دة ... اييييييه كل الناس دي ... بينادو بالرقم ... مين جوة ... رقم كام ... ايييييه ... كااااااااااااااااام !!! رقم 670 :(((((
لا بقى حرام ... اقعد استنى بقى ... تستنى عدد مهول من البني ادمين بيعملوا الفيش معاك في نفس ذات الوقت ... لمدة 4 ساعات ونص لحد مييجي دورك ... مع كم مهول من الخناقات والزعيق والقرف والمشاكل مع العساكر ال بيدخلوا ناس بالكوسة ... ثورة ايه بقى ... جتكو القررررف
المهم الحمد لله خدت الفيش بعد عناء ورجعت تاني القسم ... لا يا معلم فوت علينا بكرة شطبنا
روحت البيت مفرهد ومقتوووووول ... بابا فتحلي : حمد لله على السلامة كل دة
الضحية : أنا عايز ارجع الكليــــــة تااااااااااااااااااني :((((((
بابا (بابتسامة غير مفهومة) : انت لسة شفت حااااااجة :D


تاني يوم أول يوم رمضان :(
صحيت بدري ... جرررري على القسم ... هات فصيلة دم وفيش وقيد عائلي واربع صور من غير شعر ولا دقن ولا سوالف ولا بق ولا عينين ولا مناخير ولا وش .... :(( 
رحت عملت ام فصيلة الدم ... ورجعت القسم ... لا شطبنا تعالى بكرة ... تعالى فين انت قلتلي بتخلصو 1 
-ايوة بس بنخلص الفيش العسكري 12 عشان نسلمهم في العباسية الساعه 1 .. مليش دعوة مش ماشي الا لما اعمل الفيش ... قالي شوف ال هيفيشك مفيش حد اصلا الناس مشيت ... ازاي بقى مش معادهم للساعه 12 ..؟؟
-اه بس اول يوم رمضان بقى كل سنة وانت طيب
-يعني هو رمضان تعطلو فيه مصالح الناس ... وبعدين دي مش مصالح دة انتو ال عايزيني :(
تخش تدور على حد لغاية متعتر في واحد ابن حلال يروح يوصي العسكري ... يقوم يتنازل ويقبل يفيشني ...(هو يعني ايه يفيشني دي ... مش عارف ليه حاسسها كلمة قليلة الادب :$)
المهم ترجع للعسكري ... وبمنتهى القرف : فين ورقك
-أهو ... عايز ايه بالضبط انتو طالبين ورق كتير
-(بمنتهى القرف برضة) : انت مش عارف ورقك ... وخد مني الورق وقعد يلعب فيه ... وبعدين قالي فين المؤهل ... قلتلة لسة النتيجة مطلعتش وعايز اخلص الورق عشان الحق اكشف قبل اخر معاد بعد بكرة
قالي ملكش عندي ورق غير لما تجيب المؤهل ...
اللهم طولك يا روح ... النتيجة لسة مطلعتش اصلا ... ان شالله معن أهلها طلعت ... وقت متطلع ابقى اروح اجبها واللي يحصل يحصل
المهم المعاد بتاع التجنيد اتمد لحد 20-8 عشان الناس ال زي حلاتي ...(يحرقكو بجاز :@ :@ يعني انا اروح العباسية واستنى كل دة واعمل فيش مستعجل عشان تمدوا الكشف ... مكنت عملتة من القسم ويطلع وقت ميطلع وخلاص ... متقولوا من الاووووول :@ :@)


اليوم التالت (الخميس 4-8)
في اخبار ان الناس تقدر تروح الشؤون تقدم على بيان النجاح ... عشان التجنيد ... يا مسهل يارب
صحيت بدري ورحت الكلية ... كالعادة زحمة وقرف ... وعلى موصلت للشباك تقريبا كنت لابس الكاب بس :D
خدت ورقة ... املاها ... اكتب التاريخ ال عملت فيه التربية العسكرية ... مش فاكر ... كانت في سنة اولى ... قعدنا نجيب يمين وشمال لحد مخمنا التاريخ وحطيناه ... سلمت الورقة ... خلاص تعالى يوم الحد 
سبتهم الحد والاتنين ورحت التلات ... ها فين البيان ... لسة مجتش من التربية العسكرية .... حراااااااااام بقى انا صاحي 7 الصبح ونايم بعد الفجر ورمضان والحر دة واضرب مشوار ساعتين عشان تقولي لسة مجتش ... دة كان معادي الحد
الموظف بكل برود : فوت علينا بكرة ...
روحت البيت وانا بسب وبلعن ... الله يحرقكو :@
اكلم واحد صاحبي يقولي انا رحت الحد وخدتها الاتنين ... يابن اللذينة ... قعد يعيطلهم راحو عملوهالة بسرعه ... يعني انا هموت وافهم ... لما الحاجة ممكن تخلص علطول ... ليه القررررررف دة
استعنت بالله ورحت تاني يوم ال هو النهاردة بقى 10 رمضان ... يارب انصرني بقى :((
وصلت الكلية ... زحمة غريبة ... ام الزحمة على ام الحر في الصيام دة ... وحرب بقى على موصلت للشباك ... اسال الموظف ... اسمك اتنده ... طب وبعدين ... خلاص ورقتك جت ... هنعملك الافادة ... تعالى يوم الحد :|
-حد ميييييييين انا مسافر بعد بكرة انا مش ماشي من هنا الا لما اخد الورقة دي حاااااااالا (نسيت اقولكو .. انا رايح مطروح الاسبوع الجي ... عقبال عندكو :D )
وخناقة بقى وكلة بيتخانق وجه العميد واتخانقنا معاه ومع الموظفين وفي الاخر خدت الورقة ال دوخوني عليها
اخيـــــرا ... معايا ما يثبت اني بقيت مهندس ... 
هروح بكرة بقى اعمل الفيش العسكري واخد معاد الكشـــف بتاعي ... 
ادعووووووووووووووووووولي .... مش عايز اجي من مطروح مخصوص ويضيعو عليا الاسبوع بسبب المسخرة بتاعه الموظفين دي
.... ثورة ايــــه دي ... دة الناس سلوكياتها بقت أســـوأ :(
وللحديث بقيــة ... ان كان لينا عمر يعني ... إشطة ؟؟ :D
ان شاء الله :)

محمود أنور