الأربعاء، 12 أكتوبر 2011

جتكو القرف .. مليتو البلد



حد يفكرني كده احنا في سنة كام
آه .. سنة 2011 و داخلين على 2012 أهو
يعني المفروض اننا جيل متحضر
جيل متطور و واعي و عنده مخ يفكر بيه
قبل ما يتصرف أي تصرف

بس للأسف لسه لحد دلوقتي
فيه امخاخ تعبانة و آكلها الدود
و طبعاً بتتقسّم لكذا فئة

بس أنا هامسك فئة معينة
مش عارفة لها كلمة أوصف بيها وصف صريح
بس ممكن نحطه تحت مسمى ساخر شوية
فاعل خير .. أو تائب عن المعاصي

خلّيني أتكلم عن التفاصيل

الموضوع هايكون بـ خصوص البنات
كلنا بما فيهم أنا , بنتعرّض لـ مضايقات من عيال سخيفة
و يؤسفني اني أقول كده عن الرجالة
لان الأشكال دي مالهاش غير انه يتقال عنهم كده

بس فيه نوعية كده متخصصة في المضايقة بالكلام
لا .. مش المعاكسات اللي في الشارع
ولا الجتت اللي بتترمى في الكليات
كل دول واضحين و متشافين
و دي حاجة كويسة عشان نعرف ناخد حقنا منهم

انما أنا قصدي على المتخفيّين الجبناء
عديمي الانسانية و الآخلاق و الرباية
بتوع التليفونات و الموبايلات و الرسايل
اللي بيستخبو ورا المسميات الساخرة اللي قولتها من شوية

و المشكلة كمان انه بيحط نفسه تحت مسمى
مالوش أي علاقة بتاتاً باللي بيعمله
و ده دليل على انه عنده انفصام في شخصيته

المتخلّفين دول بقى أكتر حاجة ممكن تضايق بجد
مش كلامهم ولا العبط اللي بيقولوه ده .. لأ
انهم ماعندهمش الشجاعة انهم يتكلمو وجهاً لوجه

و هاتجيلهم منين الشجاعة أساساً
و هما مالهمش أي حق انهم يتعرضو لأي بنت
لان ده على حد علمي اسمه تحرّش كلامي
و لو اتعرف ممكن جداً يتعمل له محضر سب و قذف

الطريف في الموضوع بقى
و اللي بيخلّيني اضحك جداً على الهبل بتاعهم
ان عقولهم سايحة منهم لدرجة انهم بيخافو يتكلمو
من أرقامهم أو من ايميلاتهم أو أكونتاتهم

يقوم الواحد من دول يكلّف نفسه و يجيب خط جديد
أو يعمل ايميل أو أكونت جديد غير بتاعه
و يبدأ يمارس خططه الدنيئة بمنتهى السفالة و قلة الحيا
و بعد ما ينجز المهمة يقفله , عشان محدش يجيبه أو يكلمه

الشخص اللي بيعمل كده
اعرفي على طول انه أول حاجة كذاب أو منافق
و تاني حاجة حيوان أو كلب شوارع
و بيقف يحط راسه في صناديق الزبالة
عشان يعرف يطلع كلام قذر زيه
و في الغالب بيكون كله كلام هجص
و مالوش أي أساس من الصحة

فـ ده مايستاهلش اننا نتهز بسببه
ده أخره يتساب كده يهبهب مع نفسه زي الكلاب
و لو شاء القدر انه يتعرف و يتقفش
لازم .. لازم .. يتعمل معاه السليمة

الغباء بقى , انه مش عارف انه مختل عقلياً
و المفروض يترمى في مصّحة مجانين
لـ كام سبب معروفين جداً
زي مثلاً : بيعمل الواجب لواحد صاحبه
و زي : مخنوق منِك عشان مصدّراله الوش الخشب
أو : انِك مهزّقاه و ماسحة بكرامته الأرض
و زي : مش عارف يطولك بالذوق يقوم يسوّأ سمعتك
اعتقاداً من عقله المريض ان كده عشان محدش يطولك خالص

المحزن في الموضوع بقى
ان منهم ناس كتيرة متعلمة و خريجي جامعات نضيفة
و كمااان ولاد ناس كويسين

بيجيبو قلة الأدب دي منين ॥ أنا مش فاهمة !

أنا عندي ليستة كاملة
فيها كمية شتايم و تهزيق و أمراض محترمة
بس أنا بصراحة مكسلة جداً أكتبها
فـ كفاية بيتهيألي اللي قولته

عندي كلمتين في الآخر محشورين في زوري
و ممكن تكون رسالة موجّهة و مقصودة
ياريت كل واحد يخلّيه في حاله أحسن
و يعرف كويس أوي انه مش هايستفيد أي حاجة
و ان اللي بيعمله هايطلع عليه في حد من بيته
كل واحد فينا عنده أمراضه النفسية
فـبلاش نقعد نحدّف بعض بأمراضنا

و حتة وطني بقى
عيب كده .. ده احنا حتى جيل الثورة
و مصر عشان تتغير لازم نتغير احنا الأول
فـ المفروض نساعدها يعني


آلاء حلمي

الاثنين، 26 سبتمبر 2011

شحططة بـــعد التـــخرج ... ج2 ( خلصت وايدي على خدي )






وحشتوني أوي
معلش بقالي كتير مكتبتش ... كنت بخلص بقيت الشحططة عشان اجي احكيلكو بقا ...
كنا وقفنا ان فاضل الفيش العسكري ... رحت تاني يوم القسم وعملت الفيش وطلعت ختمتة من شيخ الحارة ومن المأمور ... الصدمة بقى ... روح اختمها من مديرية امن القاهرة ... الحمد لله بابا كان معايا خدنا العربية ورحنا على المديرية ختمناها ... وكان المفروض اطلع على الكشف يوم السبت ... بس كنا مسافرين مطروح يوم الجمعة والرجوع الجمعة ال بعدها ...
جينا الحمد لله ... طلعت تاني يوم على الكشف الطبي ... كان حتة يوووووووووووووووووووووم


السبت 20-8
نزلت من البيت الساعه 5 الصبح واحنا لسة جيين من السفر الجمعة ... المهم الحمد لله وصلت التجنيد الساعه 6 وتلت
كان فيه اتوبيسات بتدخلنا المنطقة المركزية ... ركبت الاتوبيس ... ووصلت الحمد لله
طبعا بعد معذبونا وطلعو عين ال جابونا كنت خلصت على الساعه 5 العصر وخدت لائق طبي ومستني بقى 110 جند عشان اجي اسمع الارجاء يوم الاربع
الشعب كلة خلص ومشي وانا ورقتي متعطلة متفهمش ليه 
فيييييين وفييييييييين لما طلعت الاستمارة بتاعتي ... الساعه 7 ونص ... كتر خير مصطفى مسعد كان معايا اليوم دة وفضل مستني معايا رغم انة مخلص الساعه 3 ونص وخد اعفاء كمان
نطلع من المركز نكتشف ان الاتوبيسات مش موجودة وعلينا ان نمشي هذا الطريق في عز الظلام ... اه والله في عز الظلام
الحمد لله على موصلنا للطريق كانت الساعه بقت 8 وربع وركبنا لموقف العاشر ومش فاكر حاجة بعد كدة :D


الاربعاء 24-8 
يوم الارجاء ... قلت مش رايح بدري المرادي رحت على الساعه 9 كدة .. فضلنا مستنيين لحد مبدأ يندهو التخصصات الحرجة الساعه 12 كدة
ال مش فاهم ايه الارجاء دي اانا اقولك ...
المفروض الجيش بيبقى عنده طلب على تخصصات معينة دي مينفعش يسيب اي حد منها ... بيتاخدو كلهم
الباقي بقى بيتاخد منهم ناس وناس تانية بتاخد تأجيل تلات سنين لان الجيش مش محتاجهم
والحكم في الموضوع دة تاريخ الميلاد
الجيش مثلا بيقول هناخد من مواليد يوم كذا لمواليد يوم كذا ... ومن كذا لكذا ... والباقي بياخدو تأجيل
المهم نهاية اليوم الحمد لله خدت تأجيل ... ومكنتش مصدق لان دي اخر حاجة كنت متوقعها ... انا كنت مجهز نفسي خلاص اني لابس لابس ... بس الحمد لله ... كنت فاكر ان مصر بتقولي شغلك اهم :D
خلصنا حوارات الجيش وطلعنا شهادة التخرج المؤقتة بعد عناء وقرف وبهدلة من الشؤون عندنا الله يهديهم
وننزل ميادين العمل بقى ال ايه فاكر ان مصر هتناديني اشتغل واننا هنتخطف
ونكتشف الصدمة ... السوق واقف ... المهندسين مش لاقيين شغل ... الشركات بتصفي ال عندها ... والحال بدل ميتعدل بعد الثورة ... مفيش شغل ...والفطاحل الشطار ال عرفو يشتغلو مننا بياخدو مرتبات كنا بناخدها لما كنا بننزل تدريب في الصيف واحنا طلبة مش مرتبات مهندسين ابدا
هو في ايه ... ايه ال حصل في البلد ... هنفضل كدة ولا ايه ... لااااا انا عايز اتجوز :(
اديني قاعد في البيت دلوقت ... ماسك الجرايد وهات يا تلفونات ... ونشوف شغل هنا وهناك
ادعولنا تتعدل يا اخوانا :(


محمود أنور

الجمعة، 26 أغسطس 2011

كل سنة و احنا بخير



بما ان الوحي صايم الأيام دي
و مانع عني أي إلهام عشان أعرف أكتب أي حاجة

قررت أفتكر حاجة حلوة في أيام كانت مهببة بالنسبالي
و أحكيلكو عليها ..

زي الأيام دي السنة اللي فاتت ..
بعد اتفاق بيني و بين صديقي الباشمهندس محمود
قررنا اننا نبدأ نكتب في مكان واحد مشترك
عن مواضيع قابلة للنقاش أو خواطر .. إلخ
في مدونة صغيرة على أدّنا كده

و بالفعل .. عملنا مدونة
بعد محايلة من أختي باقناعي بالموضوع ده
و تشجيع كبير من محمود

و انطلقت مدونة ولد و بنت
لتكون ميلاد اتنين جداد في عالم التدوين

و بدأنا نتكلم في أغلب المجالات
سياسي و رياضي و اجتماعي و فني ..

و بعد ما لقينا قبول من الناس على المواضيع
و إللي كان بيخلّيني نسبياً أتحسن نفسياً
بسبب اعجاب الناس بـ حاجة بنعملها
فجأة .. اختفينا و بطلنا نكتب ..
بسبب انشغالنا في الدراسة و غيره

بس آدينا أهو .. رجعنا تاني
و انهاردة أحب أقول لبنتنا المدونة : كل سنة وانتي طيبة
عشان كلمت سنة تقريباً

و كل سنة و محمود كويس و مبسوط مع مراته
و كل سنة و اختي كويسة بـ مناسبة عيد ميلادها
و كل سنة و أنا كويسة بين صحابي الكويسين
و كل سنة و كل الناس بـ خير و مبسوطين
آلاء حلمي

الخميس، 11 أغسطس 2011

شحططة بـــعد التـــخرج ... ج1


ازيكووو ... ؟؟
عاملين ايه ..؟؟
وحشتوني اوي ... بقالي كتيييييير مكتبتش .... من امتحانات الترم الاولاني
صحيح هيييييييه اخيرا اتخرجت ... وكتبنا الكتاب وعلينا الجواب ... يللا عقبالكم جميعا
الدنيا دي بتجري بسرعه اوي ... فجأة قامت الثورة ... فجأة مبارك مشي ...فجأة المجلس العسكري بقى حامي الثورة ... فجأة مصر بقت متقسمة وبقى في احزاب واخواني ولبرالي وسلفي ويساري وجنوبي وبطيخي .... فجأة امتحنا ... فجأة زنقونا في المشروع ... هوبااا اتخرجت ... ياخبر بقيت مهندس ... فجأة ودعت العزوبية ... وبقيت مسئووووووو....... 
.
.
.
.
.
.
.
.
.
عشان كلمة واحدة بتفرق كتير ... بيبسي وفودافون ادولك 10 دقايق في كل ازازة .... تييييييييييييييت
يللا مهي ناقصة ذل :@


المهم بدأنا مشاوير الجيش ... حاجة اخر قرف ... احنا نخلص يوم 27 ويقولك اخر معاد للكشف يوم 3 في الشهر ال بعده
طب ازااااي النتيجة لسة مطلعتش ... من اولها هرتلة ... وتجررري تخلص ورقك تروح القسم يقولك الفيش هياخد اسبوع على ميطلع لو مستعجل روح العباسية ... وتطييير على العباسية ... يااااااااااااخبر هي مصر كلها جية تعمل فيش ولا ايه ... كل دي بشر ... طابوووور طويييييييل قدام الادلة الجنائية ... وقفت في الطابور لحد متوصل للباب ... الحمد لله ادوني ورقة فيها رقم (1050) ... مبصتش في الرقم ... دخلت جوة لقيت طابوووور طوووووووويييييييل تاني ... أم البلد بتاعه الطوابير دي ... تقف ... تسجل اسمك ... روح عند التفييش بقى ورا المبنى دة ... اييييييه كل الناس دي ... بينادو بالرقم ... مين جوة ... رقم كام ... ايييييه ... كااااااااااااااااام !!! رقم 670 :(((((
لا بقى حرام ... اقعد استنى بقى ... تستنى عدد مهول من البني ادمين بيعملوا الفيش معاك في نفس ذات الوقت ... لمدة 4 ساعات ونص لحد مييجي دورك ... مع كم مهول من الخناقات والزعيق والقرف والمشاكل مع العساكر ال بيدخلوا ناس بالكوسة ... ثورة ايه بقى ... جتكو القررررف
المهم الحمد لله خدت الفيش بعد عناء ورجعت تاني القسم ... لا يا معلم فوت علينا بكرة شطبنا
روحت البيت مفرهد ومقتوووووول ... بابا فتحلي : حمد لله على السلامة كل دة
الضحية : أنا عايز ارجع الكليــــــة تااااااااااااااااااني :((((((
بابا (بابتسامة غير مفهومة) : انت لسة شفت حااااااجة :D


تاني يوم أول يوم رمضان :(
صحيت بدري ... جرررري على القسم ... هات فصيلة دم وفيش وقيد عائلي واربع صور من غير شعر ولا دقن ولا سوالف ولا بق ولا عينين ولا مناخير ولا وش .... :(( 
رحت عملت ام فصيلة الدم ... ورجعت القسم ... لا شطبنا تعالى بكرة ... تعالى فين انت قلتلي بتخلصو 1 
-ايوة بس بنخلص الفيش العسكري 12 عشان نسلمهم في العباسية الساعه 1 .. مليش دعوة مش ماشي الا لما اعمل الفيش ... قالي شوف ال هيفيشك مفيش حد اصلا الناس مشيت ... ازاي بقى مش معادهم للساعه 12 ..؟؟
-اه بس اول يوم رمضان بقى كل سنة وانت طيب
-يعني هو رمضان تعطلو فيه مصالح الناس ... وبعدين دي مش مصالح دة انتو ال عايزيني :(
تخش تدور على حد لغاية متعتر في واحد ابن حلال يروح يوصي العسكري ... يقوم يتنازل ويقبل يفيشني ...(هو يعني ايه يفيشني دي ... مش عارف ليه حاسسها كلمة قليلة الادب :$)
المهم ترجع للعسكري ... وبمنتهى القرف : فين ورقك
-أهو ... عايز ايه بالضبط انتو طالبين ورق كتير
-(بمنتهى القرف برضة) : انت مش عارف ورقك ... وخد مني الورق وقعد يلعب فيه ... وبعدين قالي فين المؤهل ... قلتلة لسة النتيجة مطلعتش وعايز اخلص الورق عشان الحق اكشف قبل اخر معاد بعد بكرة
قالي ملكش عندي ورق غير لما تجيب المؤهل ...
اللهم طولك يا روح ... النتيجة لسة مطلعتش اصلا ... ان شالله معن أهلها طلعت ... وقت متطلع ابقى اروح اجبها واللي يحصل يحصل
المهم المعاد بتاع التجنيد اتمد لحد 20-8 عشان الناس ال زي حلاتي ...(يحرقكو بجاز :@ :@ يعني انا اروح العباسية واستنى كل دة واعمل فيش مستعجل عشان تمدوا الكشف ... مكنت عملتة من القسم ويطلع وقت ميطلع وخلاص ... متقولوا من الاووووول :@ :@)


اليوم التالت (الخميس 4-8)
في اخبار ان الناس تقدر تروح الشؤون تقدم على بيان النجاح ... عشان التجنيد ... يا مسهل يارب
صحيت بدري ورحت الكلية ... كالعادة زحمة وقرف ... وعلى موصلت للشباك تقريبا كنت لابس الكاب بس :D
خدت ورقة ... املاها ... اكتب التاريخ ال عملت فيه التربية العسكرية ... مش فاكر ... كانت في سنة اولى ... قعدنا نجيب يمين وشمال لحد مخمنا التاريخ وحطيناه ... سلمت الورقة ... خلاص تعالى يوم الحد 
سبتهم الحد والاتنين ورحت التلات ... ها فين البيان ... لسة مجتش من التربية العسكرية .... حراااااااااام بقى انا صاحي 7 الصبح ونايم بعد الفجر ورمضان والحر دة واضرب مشوار ساعتين عشان تقولي لسة مجتش ... دة كان معادي الحد
الموظف بكل برود : فوت علينا بكرة ...
روحت البيت وانا بسب وبلعن ... الله يحرقكو :@
اكلم واحد صاحبي يقولي انا رحت الحد وخدتها الاتنين ... يابن اللذينة ... قعد يعيطلهم راحو عملوهالة بسرعه ... يعني انا هموت وافهم ... لما الحاجة ممكن تخلص علطول ... ليه القررررررف دة
استعنت بالله ورحت تاني يوم ال هو النهاردة بقى 10 رمضان ... يارب انصرني بقى :((
وصلت الكلية ... زحمة غريبة ... ام الزحمة على ام الحر في الصيام دة ... وحرب بقى على موصلت للشباك ... اسال الموظف ... اسمك اتنده ... طب وبعدين ... خلاص ورقتك جت ... هنعملك الافادة ... تعالى يوم الحد :|
-حد ميييييييين انا مسافر بعد بكرة انا مش ماشي من هنا الا لما اخد الورقة دي حاااااااالا (نسيت اقولكو .. انا رايح مطروح الاسبوع الجي ... عقبال عندكو :D )
وخناقة بقى وكلة بيتخانق وجه العميد واتخانقنا معاه ومع الموظفين وفي الاخر خدت الورقة ال دوخوني عليها
اخيـــــرا ... معايا ما يثبت اني بقيت مهندس ... 
هروح بكرة بقى اعمل الفيش العسكري واخد معاد الكشـــف بتاعي ... 
ادعووووووووووووووووووولي .... مش عايز اجي من مطروح مخصوص ويضيعو عليا الاسبوع بسبب المسخرة بتاعه الموظفين دي
.... ثورة ايــــه دي ... دة الناس سلوكياتها بقت أســـوأ :(
وللحديث بقيــة ... ان كان لينا عمر يعني ... إشطة ؟؟ :D
ان شاء الله :)


محمود أنور

الخميس، 9 ديسمبر 2010

بابا ... : إحنا ليه مش صحاب ..!؟


أنا عارفة انك راجل عظيم جداً
بتشتغل و بتتعب عشان تجيبلنا كل إللي عايزاه
وقت مابتعب ووقت مابفرح مابتقصرش
و ف المناسبات كمان بتعمل الواجب و زيادة

بس مش ده بس إللي أنا محتاجاه
أصل أنا أوقات كتيرة بأحس إنك مجرد بنك
بأسحب منه فلوس كل ما أحتاج
ماهو انت أبويا مش عشان كده بس

أنا بجد نفسي تقعد معايا شوية
تيجي تسألني كل يوم عني وتنكش ف تفاصيلي
أصل أنا مابعرفش أجي أحكيلك
لا تكون جاي من الشغل متدايق

أنا عارفة إنك دايماً مشغول
ولما بترجع البيت بترجع عشان تريح أعصابك
فهاتبقى بواخة مني لو قابلتك بمشاكلي

ساعات باستغرب هو احنا ليه مش صحاب
بس دايماً بلاقي مبررات أقنع نفسي بيها انك انت السبب
ماهو أصلك ماتعرفش ان الصحاب مابيقفشوش على بعض
لما بيحكو ويشكو لبعض
وأنا كل محاولاتي ف اني أقربك مني و أحكيلك على حاجة
يااما مابتعجبكش وتتدايق مني
يااما مابتفهمنيش كويس
فـبتقفل منك

أنا مش قصدي أدايقك بكلامي ده
ولا حتى قصدي يكون فيه تقليل من احترامي ليك

بس عارف انت لما حد يبطل حاجة
عشان مابيتسمعش أو مابياخدش الاهتمام إللي متوقعه
أهو كده بالظبط

طب انت عارف بقى
أنا عارفة عنك حاجات أكتر من الحاجات إللي انت تعرفها عني
مع ان المفروض يكون العكس .. بيتهيألي يعني

أقوللك على حاجة كمان
انت مابتاخدنيش ف حضنك غير ف الأعياد
وده بيطبع عليا أنا واخواتي .. محدش فينا بيعمل كده
وزعلان عشان بعاد عن بعض

شوفت .. أدي مبرر أهو

ماتزعلش مني بس لو فاكر انك بتحاول تصاحبني
كل فترة و التانية
فانت غلطان
وماتزعلش مني لما تسألني "مالك..؟" .. وأقوللك : مفيش

فيه حاجات كتيرة باعتبرها أساسيات بالنسبالي
انت مابتعملهاش

بس عارف ... أنا بحبك أوي



آلاء حلمي

الجمعة، 26 نوفمبر 2010

المـــــــــهندس المـــــــظلوم ... !!





شعب جاهل .... اه والله جاهل ... يعني نسبة حوالي 95% من شعب مصر متعلمين واميين ميعرفوش حاجة عن المهندس المدني ... ونص معلوماتهم عنه مغلوطة ... يبقي جاهل ولا لا ...؟؟
هو مش جاهل عموما بس جاهل بينا نحن معشر المهندسين المدنيين :D
عشان محدش يزعل مني بس ... دايما احنا مظلومين كدة ...
بص بقي منك له
انا هرجع في كلامي لو عشرة من ال قروا البوست دة طلعوا كانوا عارفين الكلام ال هقولة النهاردة قبل مقولة ... 
اتفقنا ..؟؟
مين المهندس المدني دة ... وبيعمل ايه في الدنيا ... ??
تقدر تقولي ... 
اكيد هتقولي الراجل ال بيبني العمارات والفلل ... المقاول يعني من الاخر
بسسسسسسسسسسسسسس
شفت انت ظاااااااااااااااالم :@
مش هقول بقي شعارات ... احنا الحضارة وبناة المستقبل ... والكلام ال لا بيودي ولا بيجيب دة
بس احنا مش المقاولين ال بينفذوا ... زي مالاغلبية فاكرين
تعالوا كدة معايا لو ليكو شوق تعرفونا ...
أولا : المهندس المعماري بيصمم شكل المبني علي حسب الغرض منه ... وتخصصة محدود في المباني السكنية والادارية والتجارية والخدمية
وطبعا بيحدد مسارات الحركة في المبني ودراسات الرياح والاضاءة والدراسات السمعية وبيراعي كل النواحي في تصميم شكل المبني 
طب المهندس المدني بيعمل ايه ...
المهندس المدني بقي بيعمل حجات كتير اوي ...
اولا العادي والمشهور وال اغلبية المهندسين المدنيين العاديين بيعملوه
تصميم المباني انشائيا بعد التصميم المعماري
يعني ايه ...؟؟
يعني بعد المعماري ميرسم الشكل ... يديه للمدني يقول الشكل دة هيتشال ازاي ... هنحتاج نحفر قد ايه في الارض ونعمل نظام الاساسات ازاي ويصممة ... ويختار نظام المبني كلة ... ويختار اماكن الاعمدة والكمرات ويصممها ... ويحدد سمك الاسقف والبلاطات وهنحتاج حديد تسليح قد ايه ... من غير الدخول في التفاصيل ... كمان المدني بيبقي متخصص اكتر في التنفيذ والاشراف علي العمال وعلي المقاول 
عملية انشاء المبني المدني بيكون له فيها تلات ادوار اساسية
اولها التصميم ... ثانيا المراجعة "مهندس الحي" ... ثالثا الاشراف ... رابعا الاستلام " المهندس الاستشاري " ... كل دة شغل المهندس المدني
بس كدة ... هو دة شغل المهندس المدني ... ؟؟
اصبروا عليا انتوا لسة شفتوا حاجة ؟
دة كان الشغل العادي ... البسيط ... 
تعالوا بقي للشغل العالي ... ال محدش يعرف عنه اي حاجة غيرنا احنا :p
المهندس المدني بيصمم الكباري ... والطرق ... واشارات المرور "تخيلوا !!!" والمواني ... والخزانات العلوية ... والخزانات الارضية ... وحمامات السباحة ... وبيحسب كميات الحفر وكميات الردم اللازمة لتنفيذ اي حاجة
المهندس المدني بيصمم المصانع وقواعد الماكينات 
المهندس المدني بيصمم السدود القنوات والترع ومناوبات الري وتوزيع المياه علي الاراضي الزراعية ونظام صرف المياه وتحديد مناسيب المجاري المائية 
المهندس المدني بيصمم شبكات المياه والصرف الصحي ومحطات الرفع وتحديد قدرة المضخات ال هيحتاجها 
المهندس المدني بيصمم محطات تنقية المياه ومعالجة الصرف الصحي واحواض الترسيب
المهندس المدني بيصمم الانفاق تحت الارض وبيصمم المنشئات المعدنية سواء كانت كباري او سكك حديد او ابراج او حتي سلالم عبور المشاه

مظلومين احنا ... اي حد فاكر نفسة ممكن يعمل شغل فاكره شغل المهندس المدني ... ال هوا بناء البيت ويعك فيه اي حاجة وبعد شوية يقع علي نفوخة ... وهو لسة فاكر انة بيفهم
شغلنا اوسع من تخيل اي حد بكتير
المهندس المدني بيتعامل مع الكون كلة 
وبيتعامل مع كل العلوم
لازم يبقي عندة ادراك بالطب والهندسة الميكانيكية والزراعه والعلوم .... الخ الخ
وسمعت كلام كتير ... المدني دة ملوش لازمة ... المدني دة ادبي هندسة ... دة اسهل قسم ... دول مش بيعملوا حاجة ....
من الاخر يا ولاد التيت انتوا ... شيلوا المهندس المدني من الدنيا ... تطربق علي نفوخكوا علطول :@
بطلوا هجص بقي ... من الاخر ... مفيش حد يستحق لقب مهندس مثل المهندس المدني
وال مش عاجبة ... يشرب من البحر ... من غير محطة مية تحلية ... او يدور علي حيطة خرسانة ميكونش مهندس مدني هو ال مصممها يخبط دماغة فيها ... او يروح يرمي نفسة من فوق كوبري ميكونش متصمم برضة من مهندس مدني ...

محمود أنور

الخميس، 18 نوفمبر 2010

حكم بالإعـــــــــدام .... حيّــا !!!


عابد لربي

بالتأمل
والصلوات


حكم 
عليّ

بالإعدام 
حيا !! 

كأفضل ما قد يكون تمثال الخزف
قد نحتُّ
يتبارى الناس في وصف جمالي 
ودقة صنعتي
لكنهم لا يعرفون 
...مدى ضعفي
ففي أول سقطة لي
سيجدونني
قد كسرت 

متعتي في السفر
وتغير الزمان والمكان 
ولوح العربيات
وانا شبه ساكن
قاعد في مكاني

عامل زي أوتوجراف
اكتب بقلبي في صفحات
حياة الناس


عاشق
بعوم في بحر شوقي ليها
وسارح في سما عينيها
وقلبي
بس ليها


لتكوني
حبيبتي ..
خطيئتي ..
ذنبي ..
الذي يعلم الله ..
...أن ليس لي منه توبة !!

كضيف شرف : طارق خضر

السبت، 6 نوفمبر 2010

خلّي بالك ... تـفرق كتيـر


مبدئياً .. الكلام إللي هاقوله مابينطبقش على كل الناس

من العلاقات المختلفة إللي شوفتها وسمعتها من إللي حواليا
لاحظت حاجة مهمة جداً محدش بياخد باله منها إلا قليلين أوي

شكل العلاقة بياخد نمط معين ثابت مع أي إتنين بيفكروا يرتبطوا
لقيت : الإتنين بيتخانقوا خناقات هايفة ممكن توصل بيهم للإنفصال
الإنفصال هنا حل سليم مادام مفيش تفاهم
وفيه ناس بتخاف تنفصل عشان كلام الناس وغيره من الحجج دي
وبتفضل تعاني طول حياتها مع الطرف التاني
والمشاكل الصغيرة تتراكم وتكبر وتتعقد

المهم ده مش موضوعي..
موضوعي بقى إللي استنتجته إن الطرفين لما بييجو يرتبطوا
أياً كان شكل الإرتباط يعني
بيفكروا في حاجات سطحية ( الفستان والقاعة والمعازيم - هانعيش فين وهانقضي شهر العسل فين ... إلخ )
أو كلام الحب والشوق وأي حاجة معسولة من دي .. بتنسى الواحد ساعات انه يفكر في الأهم
كل ده حلو .. مش وحش وعايزينه وبيفرحنا وأوقات حلوة وكل حاجة
بس لما فكرت فيها شوية لقيت إن كل ده عايزينه بس

مقصودي : إننا لازم نفكر كويس جداً في الحاجات اللي إحنا محتاجينها وتناسبنا .. مش إللي عايزينها وخلاص
عشان مانرجعش نقول : لأ مش ده إللي كنت عايزاه / عايزه .. أنا كنت محتاجة / محتاج كذا وكذا
ونخلط الأمور ببعض ومن هنا تحصل التصادمات
ونتفاجئ بحاجات ماكناش آخدين بالنا منها قبل كده

يعني إللي سمعته كان عبارة عن : عايزين وعايزين وعايزين .. فـحياتهم إتقلبت لضغط نفسي وخناق
فــتخيلت لو كانت كلمة " محتاجين " موجودة بدل " عايزين " .. هايكون شكل العلاقة ماشي إزاي
أكيد هاتبقى كل الإختيارات سليمة و سلمية
و إن إختلفوا هايدوروا على إللي محتاجين يعملوه برضو عشان مايتطورش الخلاف

كل الرغي ده من الآخر بيتلخص في جلمة واحدة
" خد أو إعمل إللي إنت محتاجه فعلاً .. مش إللي إنت عايزه بس "



آلاء حلمي

الاثنين، 1 نوفمبر 2010

للأســـــــــــف ...العجول فهمت واحنا مفهمناش



للاسف احنا فرحنا بالهزيمة للترجي واحنا مش واخدين بالنا اننا كلنا كعرب وشمال افريقيا خصوصا خدنا علي قفانا واحنا مش شايفين من اللي ادانا علي قفانا اصلا ...


العملية مقصودة ومدبرة من الاتحاد الافريقي لاقصاء فرق شمال افريقيا سواء في بطولات الاندية او بطولات المنتخبات

السعادة كانت واضحة جدا في ارجاء الاتحاد الافريقي بالنتائج المخيبة للمنتخبات العربية في تصفيات امم افريقيا تحيزا للفرق السمراء

وبعدين جه التحيز الواضح السافر لمازيمبي في بطولة الاندية الابطال 
وقعو بينا الاول وبين الترجي .... ومكنتش بلوم عليهم اي لوم في مباراه اياب نصف النهائي ... لومي كلة كان علي الحكم وعلي لاعبي النادي الاهلي ال خرجو من المباراه تماما مجرد محسو ان الحكم ضدهم وانهم هيقفو عاجزين ومش هيعرفو يجيبو جون في ظل هبوط مستواهم 
لكن اي فريق في العالم لما يلاقي الحكم بيساعده ومهيئلة الجو انة يكسب حتي لو بالغش هيكسب ومش هيقول لا

ودة كان متعمد عشان يبعدو الاهلي عن طريق مازيمبي عشان عارفين ان شوكة الاهلي اقوي ... 

وبعض الاذكياء قالو ان الاتحاد الافريقي كان متحيز للترجي ودة غلط
الاتحاد الافريقي متحيز لفرق القاره السمراء

باعتبار فرق شمال افريقيا مش منها اصلا ... خلاص يقسمونا قارتين ... :D

وجه الدور علي الترجي :(
اول معرفت ان الحكم المعين لمباراه الاياب كان الحكم القدير كوكو ... صاحب فضيحة مباراة الشبيبة والاهلي ... ااتاكدت كل ظنوني ... والعملية بقت علي عينك يا تاجر


بس ارجع واقول الترجي مكانش يستحق الفوز علي مازيمبي ... خصوصا لما شفت ملخص المباراه ... أخطاء ساذجة من الحارس والدفاع ... بغض النظر عن تحيز الحكم 


كل دة مش مهم ... المهم الكلام ال جاي ...
يا ريت نصحي ونفوق ونبعد الخلافات عننا ... ال حصل لاخواننا التوانسة في ماتش مازيمبي يزعلنا ... لان احنا وهما والشبيبة كمان في ماتش العودة مع مازيمبي كنا كلنا مستهدفين من قبل الاتحاد الافريقي ... لصالح مازيمبي

 يعني حتي الاتحاد الافريقي بيوقع بينا يا عرب ... مش كفايا الغرب :(


في الاول والاخر احنا العرب والمسلمين ملناش غير بعض

العجول فهمت والعرب مفهموش


شوفو الفيدو دة 

محمود أنور

الجمعة، 22 أكتوبر 2010

الإستعمار الذي لن ينتهي مؤقتاً إلا بدخول الشتاء


مع دخول صيف السنة دي .. بدأت أحس إن فيه حاجة مش تمام بتحصل
شوية شوية ولقيت هجمات خفيفة من تحت لتحت
ماكنتش حاطة في بالي إن الموضوع هايكبر ويوصل للحرب

الموضوع دة اكتشفته من فترة
بدأ بالمطبخ وبالتدريج انتشر في كل البيت
الحكاية كانت بتزيد كلما زادت الضحايا من بقايا الاكل
فجأة من غير مقدمات ألاقي جيوش اترصت وهجمت ولمت الليلة بسرعة بسرعة واختفت

وأما ابتديت أقلق من الموضوع دة عشان التضاعف الغريب كان سريع
وكانو بيقضو على كل اللي يقابلهم
لدرجة انهم كانو بيهجمو ع اللي في ايدي كمان .. فراغة عين
قررت أكلم السطات العليا (والدي العزيز) وأشرحله إننا في موقف محرج
وان الحكاية هاتخرج عن السيطرة
وكان الرد ودن من طين و ودن من عجين

بس أنا ماسكتش .. قولت مابدهاش بقى .. أنا هاعرف أتعامل .. وطبعاً كانت دي فزلكة مني
بدأت أشن هجماتي أنا كمان إللي كانت في منتهى الغباء
غرقتهم مياة .. و دوست عليهم بالشبشب و عملت فيها جندي مجند مقنع ودخلت أحارب بالمبيد
وفشلت فشل ذريع محطم للآمال

فـقررت أعمل وقفة احتجاجية بإن لآ بقى كدة كفايــــة
ووقفت في قلب الصالة أقول : يا رجالة ... يارجاااالة إحنا ممكن نفررررط في أي حاجة
أااااااااااااي حاجة إلا الحرية
وما إن انتهيت من الجملة إلا ولقيت المخدة لازقة في وشي ووراها جملة : بس يابت عايز أسمع النشرة

لميت نفسي واتركنت على جنب
ومن غيظي الشديد بقى لما لقيتهم ماليين علبة اللوبيا ومخرمينها
حتى اللوبيااااااااا ماعتقـتوهاش ..! طب والله لا أفتح عليكو المياه السخنة ياولاد الآفاعي
وأخليكو عبرة لمن يعتبر .. بس طبعاً ولا أثّـر
واللي نجى منهم نزلو يجرو على الأرضية زي القرود
أعمل فيكو إيييييه ...!؟ أربي آكل نمل عشان أرتااااااااااااح

في الآخر قررت أستسلم بقى وأرمي طوبتهم
وبكرة الشتاء ييجي ويتلمو في البيات الشتوي



آلاء حلمي

الأربعاء، 13 أكتوبر 2010

خالد سعيد ... سمية أشرف ... وأنا وانـــت :(


لا بقي ... كفاية كدة ... حرام والله ...
خالد سعيد وقالوا عليه مدمن ومتحرش وسوابق ومسجل خطر وغيرو تقرير الطبيب الشرعي وقالو متهرب من الخدمة العسكرية ولغاية دلوقت محدش عارف يجيب حقه...
خالد لسة دمة مبردش ومش هيبرد لان محدش جاب حقه ... واللي قتلوه مش هيتعاقبوا ...
وجه الدور علي اخواتنا البنات ... مهو دة ال ناقص ... في بلد انعدمت فيها النخوة والرجولة ... وضاعت الاخلاق ... وسمحت النجوم والرتب علي الاكتاف ان شوية حيوانات من عديمي الرجولة يعتدو علي بنات جامعة الازهر بالزقازيق بالضرب والاهانة ...والله مكانش اعتداء عليهم قد مهو اعتداء علي شرفي وشرفك وشرف كل واحد فينا ...

سمية أشرف...(وهي أشرف منهم كلهم) ... بنت كل ذنبها انها منتمية للاخوان المسلمين ... دة لو اعتبرناه ذنب يعني ... تتضرب بالشلوت ... بالرجل في بطنها وباللكميات ... وظابط حيوان يقلع الحزام وينزل ضرب في البنات بالحزام وبالرجل ... وبعد كل دة لما تيجي الاسعاف تاخد البنت المصابة ... ياخد منهم الرخص ويمنعهم انهم ينقلو البنت للمستشفي ... دة ايه اللي بيحصل دة ... احنا لو اسرائيليين والله مهيعملو معانا كدة ...

وتتصدم لما تقرا جريدة حكومية قالبة الحقائق تماما وكاتبة ان البنات هما ال اعتدو علي الامن وحدفوهم بالحجارة كمان ... ياعيني الامن المساكين اتحدفو بالحجارة واتعوروا واوا وهما واقفين ساكتين مبيعملوش حاجة ...
ادي الخبر من جريدة المساء المبجلة :
http://amc.amiral.com/almessa2010/index.php?c=html/main/articleDetails&article_id=636

وادي صورة الخبر منشورة برضة في جريدة المساء



لكن علي الجانب الاخر الخبر منشور في المصري اليوم بصورة مخالفة تماما :


ودة مقال عن الحادثة في مدونة واحد من الاخوان :

المفاجأة جت من موقع مصراوي ... اللي نشر الخبر مصحوبا بفيديوهات مؤكدة لكذب ادعاءات المساء :





والفيديو اهو لسمية بتحكي بعد الاعتداء ... ومنع الامن لعربية الاسعاف انها تنقل سمية للمستشفي !!!







جمد قلبك بقي ... انا عن نفسي مقدرتش امسك نفسي ولا دموعي ... فيديو الاعتداء نفسة :





انا بجد مقدرتش امسك نفسي ... حسيت بذل رهيب ... انا طالب في جامعة الازهر ... واختي طالبة في الازهر ... السنة الجاية هتبقي في الجامعة برضة ... هتتعرض لحاجة زي دي ... هرضاها ... هقبل بيها ... طب دي اختك انت ... قولي هتعمل ايه لو حصل معاها كدة ... سؤال لكل واحد فينا ... ؟؟؟

والله العظيم حرام ... حسبي الله ونعم الوكيل ... انا مش اخوان ولا انا كفاية ولا 6 ابريل ولا ليا اي نشاط سياسي بس بجد كفاية ... حرام ... هنفضل ساكتين كدة لحد امتي !!!
هيقولوا عليها ايه المرادي ... كان معاها لفافة فيها نبات اخضر اتضح انه نبات البانجو ... ولا هيقولو عليها ...

جاسوسة ولا ارهابية ولا هيقولو ايه المرادي !!!
مش هي لوحدها هي وكل البنات ال تم الاعتداء عليهم في الفيديو المنشور :(

امبارح كان خالد ... والنهاردة سمية ... بكرة أنا ... وانـــــــــت .

رابط صفحة كلنا سمية أشرف علي الفيس بوك

ياريت ننشرها ونساعدهم ... ونفسي مرة واحدة ... منسكتش علي حقنا :(

محمود أنور

الخميس، 23 سبتمبر 2010

لـحياة هاديـة


عن علاقة الراجل بـمراته أو خطيبته هاتكلم
بعيـداً عن العلاقه الجنسيـه أو ما شابه

عندي معتقـدات بيـتهيألي هي إللي المفروض تخلي العلاقه دي تكون إلي حد ما ناجحه
رغم إنها حاجات صغيره .. إلا إن معظم الرجاله بيتغاضوا عنها أوقات كتير
متـحججين بإنهم مش فاضيين أو متدايقين .. أو أي حاجه من دي

المعتقدات دي بـتبدأ من :
- لازم يكون الراجل فاهم كويس جداً إنه بيتعامل مع كائن حساس (رفـقاً بالقوارير)
- يهتم بـكل تفصيله بـتقولها أياً كانت .. حتى لو حاجه تافـهه
- يعرف : هي بتحب إيه .. بتكره إيه .. مين الناس إللي بتحبهم ويحبهم عشانها
إيه الآماكن إللي بتحب تروحها ويخرجها فيها .. وهكـذا
- كل فتره يعمللها مفاجأه حلوه .. أو يجيبلها هديه .. حتى لو كانت وردة .. (بتفرق كتير)
- مش لازم عشان يبـين حبه ليها يـبالغ فيه .. (بتقلب بـخنقه وبيبقى زي طوق إتلف حوالين رقبتها .. ودي بدايه لمشاكل)
- مفيش أي وجهة نظر مقنعه أو سبب يبرر إنه : يهينها .. يقارن بينها وبين حد تاني
يزعق فيها .. يخلي سيرتها على لسان إللي يسوى وإللي مايسواش .. إلخ من الحاجات دي

و أخيراً وليس آخراً ... لإن أكيد فيه حاجات تانيه كتيره :
فيه حاجتين مهمين .. الآولى : متفاهم معاها وفيه حاجات مشتركه بينهم
وده بيساعد على التواصل جداً
التانيه : مشاركته وتشجيعه ليها بيأثر جداً .. عاطفياً بقى .. عملياً .. أياً كان يعني
المهم إن يكون فعلاً فيه مشاركه حقيقيه
حتى لو صحيت هي في يوم من الآيام ولقته محضر الفطار وجايبه جنبها ع السرير (لو متجوزين)
أو صحيت لقت وردة متسابه ليها منه (لو مخطوبين)
وغيره بقى...

بيتهـيألي الحاجات الصغيره .. بتخلي الحياه عظيمه وجميله


آلاء حلمي

الأربعاء، 15 سبتمبر 2010

ســــر النــــبضات



-"أيها الأرق العنيد... حلق عني بعيدا..."
هتفت بالكلمة جوارحي وانا اتقلب في سريري وقد جاوز الوقت منتصف الليل دون أن أحظي بالنوم اللذيذ...
-"ماذا يشغلك ياعقلي... بم تفكر... دعني أنم قليلا"
سمعت صوتا في أذني يهمس 
*"ليس هو المذنب يا صديقي... انه قلبك هذه المرة"
تلفت بجواري باحثا عن مصدر الصوت فلم تصب عيناي أحدا
*"لست حيث تفتش... أنا حيث تركتني"
حينها تذكرت صاحب الصوت... وهرعت مسرعا إلي درج مكتبي... وسحبت مقبضه لاسمع صوت سعال خفيف
*"لقد غطاني التراب... أهملتني وتتركني لأجف وألقي مصيري في سلة مهملات حقيرة... أهذا فعل الأصدقاء"
اسرعت إلي قلمي الحبيب أنظفه وانا اعتذر
-"عذرا يا صديقي... شغلتني عنك الدنيا...سامحني كما عهدتك دائما"
حسبته يغمزني وهو يقول
*"وهذه  الدنيا هي التي أصابتك بالأرق أيضا... دقات قلبك تبرئ الدنيا... وتشير بأصابع الاتهام إلي أخري"
رفعت حاجبي بخبث وانا اقول 
-"يبدو أنني سأعيدك الي الدرج حتي تتخلص من تطفلك"
فرد بوجوم
*"هذا هو ما أنتظره منك... وأنا من حسبتك صديقي"
-"لا تحزن يا صديقي... لقد جئت في وقتك"
رأيته يتألق وهو يقول
*"حدثني عنها قليلا... أهي فاتنه فوق الحد ، ممشوقة القد ، ناعمة الخد..."
قاطعته هاتفا -"صه يا أحمق... ومنذ متي أصف فتاة وأقع في المحظور"
اجابني بحدة *"أنت لا تصف فتاة ولا غيرها... ولا تحتاجني إلا في المصائب والأحزان... لأخفف عنك مابك من بلاء"
-"صدقت... ولكن هذه المرة تختلف"
ضحك بمكر قائلا 
*"هذا ما باحت به دقات قلبك... حسنا... حدثني عنها قليلا"
اعتدلت في جلستي علي المكتب وبدا علي الاهتمام
-"لتعلم يا صديقي أني لم أخبر أحدا سواك عن ما يجيش به صدري ، وان كنت اختصصتك بهذا فلتعلم مدي ما أكنه لك من حب وتقدير"
*"جزاك الله كل خير... أوجز قبل أن يذوب حبري شوقا"
ضحكت بشدة... -"حسنا أيها العاشق... سأخبرك"


سأحكي لك يا قلمي ســــــر النبضــــات ...
الشوق إليها يبــــــلي أعتي الصـــخرات ...
لو نلت بحظوة رؤيتـــها إحـــدي المرات ...
لســــــــال مــــدادك عشقا قطـــــــرات ...
ولدمت حياتك تــــــدعو رب ســــماوات ...
أن تفني حبرك تكتب عــــــذب الكلـمات ...
وتـنشد عبارات تصف فلا تجد عبــارات ...
وتطلب أقصوصة شعر فتخذلك الأبيــات ...
وتقول سأكتفي بكلمات ... فتأبي الكلمات ...

فهذا حالي يا قلمي
لا أجد عبارات ... وتخذلني الأبيـات ...
وتأبي ان تبحر في وصفها الكلمــات ...
فالكل يخشي غرقا في بحر صــفات ...
فيها تضرب أمثال وتــُـقصّ حكايات ...
فيها تنشد أشعار وتــُـغنى أنشــودات ...
فيها حــــــــارت كـــل الفــــكــرات ...

لو تعلم حالي يا قلمي
لرأفت بحالي ...
زلزال يضرب في قلبي
لذِكر غزاليِ...
لا يهدم بل يرفع حبي
قصرا عالي...
اسكنها فيه ملهمتي
لو تعلم حالي...
لصنعت لخلك صندوقا
يجمع كل الأموال ِ...
يهديها برضا ساره قلبي
مهر وصالي...

لو تعلم حلمي حين منامي...
تزينه أميرة حور الاكوان ِ...
أحببت النوم لألقاها ...
اخبرها جهرا ...
ما أخفي سرا ...
أنشدها شعرا ...
ما كتب بناني ...

آه يا قلمي لو تعلم ...
أراها تنزل من سلم ...
وأنا علي أول درجة ...
من درج السلم ...

ترنو كزهرة نرجس ...
تداعبها نسمات الريح ...
وبصدري قلبي يرقص ...
لحظات ويستريح ...

وأفيق وحيدا من نومي ...
ليس معي الا قلمي ...
يهمسني بعتاب الصحب ِ...
لم تقصص سر النبضات ...
لم تقصص سر النبضات ،،،

محمود أنور