الأربعاء، 12 أكتوبر، 2011

جتكو القرف .. مليتو البلد



حد يفكرني كده احنا في سنة كام
آه .. سنة 2011 و داخلين على 2012 أهو
يعني المفروض اننا جيل متحضر
جيل متطور و واعي و عنده مخ يفكر بيه
قبل ما يتصرف أي تصرف

بس للأسف لسه لحد دلوقتي
فيه امخاخ تعبانة و آكلها الدود
و طبعاً بتتقسّم لكذا فئة

بس أنا هامسك فئة معينة
مش عارفة لها كلمة أوصف بيها وصف صريح
بس ممكن نحطه تحت مسمى ساخر شوية
فاعل خير .. أو تائب عن المعاصي

خلّيني أتكلم عن التفاصيل

الموضوع هايكون بـ خصوص البنات
كلنا بما فيهم أنا , بنتعرّض لـ مضايقات من عيال سخيفة
و يؤسفني اني أقول كده عن الرجالة
لان الأشكال دي مالهاش غير انه يتقال عنهم كده

بس فيه نوعية كده متخصصة في المضايقة بالكلام
لا .. مش المعاكسات اللي في الشارع
ولا الجتت اللي بتترمى في الكليات
كل دول واضحين و متشافين
و دي حاجة كويسة عشان نعرف ناخد حقنا منهم

انما أنا قصدي على المتخفيّين الجبناء
عديمي الانسانية و الآخلاق و الرباية
بتوع التليفونات و الموبايلات و الرسايل
اللي بيستخبو ورا المسميات الساخرة اللي قولتها من شوية

و المشكلة كمان انه بيحط نفسه تحت مسمى
مالوش أي علاقة بتاتاً باللي بيعمله
و ده دليل على انه عنده انفصام في شخصيته

المتخلّفين دول بقى أكتر حاجة ممكن تضايق بجد
مش كلامهم ولا العبط اللي بيقولوه ده .. لأ
انهم ماعندهمش الشجاعة انهم يتكلمو وجهاً لوجه

و هاتجيلهم منين الشجاعة أساساً
و هما مالهمش أي حق انهم يتعرضو لأي بنت
لان ده على حد علمي اسمه تحرّش كلامي
و لو اتعرف ممكن جداً يتعمل له محضر سب و قذف

الطريف في الموضوع بقى
و اللي بيخلّيني اضحك جداً على الهبل بتاعهم
ان عقولهم سايحة منهم لدرجة انهم بيخافو يتكلمو
من أرقامهم أو من ايميلاتهم أو أكونتاتهم

يقوم الواحد من دول يكلّف نفسه و يجيب خط جديد
أو يعمل ايميل أو أكونت جديد غير بتاعه
و يبدأ يمارس خططه الدنيئة بمنتهى السفالة و قلة الحيا
و بعد ما ينجز المهمة يقفله , عشان محدش يجيبه أو يكلمه

الشخص اللي بيعمل كده
اعرفي على طول انه أول حاجة كذاب أو منافق
و تاني حاجة حيوان أو كلب شوارع
و بيقف يحط راسه في صناديق الزبالة
عشان يعرف يطلع كلام قذر زيه
و في الغالب بيكون كله كلام هجص
و مالوش أي أساس من الصحة

فـ ده مايستاهلش اننا نتهز بسببه
ده أخره يتساب كده يهبهب مع نفسه زي الكلاب
و لو شاء القدر انه يتعرف و يتقفش
لازم .. لازم .. يتعمل معاه السليمة

الغباء بقى , انه مش عارف انه مختل عقلياً
و المفروض يترمى في مصّحة مجانين
لـ كام سبب معروفين جداً
زي مثلاً : بيعمل الواجب لواحد صاحبه
و زي : مخنوق منِك عشان مصدّراله الوش الخشب
أو : انِك مهزّقاه و ماسحة بكرامته الأرض
و زي : مش عارف يطولك بالذوق يقوم يسوّأ سمعتك
اعتقاداً من عقله المريض ان كده عشان محدش يطولك خالص

المحزن في الموضوع بقى
ان منهم ناس كتيرة متعلمة و خريجي جامعات نضيفة
و كمااان ولاد ناس كويسين

بيجيبو قلة الأدب دي منين ॥ أنا مش فاهمة !

أنا عندي ليستة كاملة
فيها كمية شتايم و تهزيق و أمراض محترمة
بس أنا بصراحة مكسلة جداً أكتبها
فـ كفاية بيتهيألي اللي قولته

عندي كلمتين في الآخر محشورين في زوري
و ممكن تكون رسالة موجّهة و مقصودة
ياريت كل واحد يخلّيه في حاله أحسن
و يعرف كويس أوي انه مش هايستفيد أي حاجة
و ان اللي بيعمله هايطلع عليه في حد من بيته
كل واحد فينا عنده أمراضه النفسية
فـبلاش نقعد نحدّف بعض بأمراضنا

و حتة وطني بقى
عيب كده .. ده احنا حتى جيل الثورة
و مصر عشان تتغير لازم نتغير احنا الأول
فـ المفروض نساعدها يعني


آلاء حلمي

هناك 15 تعليقًا:

  1. اسماء عفيفي12 أكتوبر، 2011 2:37 م

    مووضوع جميل وعانيت منه كتييييييييير اوى وخصوصا فموضوع الموبايل كل فتره اغير الخط بسبب اى معاكسه لانهم بقو فقمة السفاله وانتى عارفه ان وضعى عشان متجوزه ممكن يسببلى مشكله لما واحد يمسكنى مثلا يقلى انا بحبك وعايزك تكلمينى ومنتهى السفاله ومش رقم لا يمسكك بارقام بجد شغل حيوانات

    ردحذف
  2. أيوا ..
    المشكلة ان عقلهم بيكون غايب
    مش حاسسين مدى المشاكل اللي ممكن يتسببو فيها
    و بيدّو لنفسهم الأحقية مش عارفة ليه

    ردحذف
  3. يالهووووووووووي ... كل دة ومكسلة :D :D :D :D

    ردحذف
  4. اسكتي يا محمود :D
    ده أنا كده و متماسكة جداً كمان
    ده كان فيه شتايم تانية بس قولت بلاش :))

    ردحذف
  5. والله كل كلمة قولتها صح دة الواحد بتطلع روحه بجد كتير مع معاسكات التليفونات والجاية الكتيرة دي وبجد انا من النوع اللي بيتضايق جدا" من الحاجات واتاثتر واقعداعيط ازاي الناس دس بتأذي الناس وبيضايقوهم ومش خايفين من ربنا ومش خايفين ان ربنا يردلهم دة في حد من اهل بيته بجد مش عارفة بس اللي علارفة ان الناس دول مرضي نفسين بجد

    ردحذف
  6. المشكلة فعلا انهم بيبقوا مصدقين نفسهم اوى ...
    وديما بيقع معايا اللى يبعت الماسيدج ويقفل الاكونت ده ... ولا يبعت الميل وخلصنا
    نفسى امسك واحد فيهم من حتة بتوجعه كده و انزل عليه باللى فى رجلى

    اما الناس بتوع الكلام العادى دول فاحسن حاجة معاهم انك تعمليهم صامت و تخليهم يهوهو بقا زى الكلاب

    كان نفسى اعرف الليستة :D :D

    ردحذف
  7. المعاناه الأزلية لكل فتاه تعيش فى مجتمع ذكورى يعامل المرأة كقطعة إكسسوار

    سنشعر بنجاح الثورة عندما نجد أن الشوارع خلت من التحرشات وجميع المضايقات من النوع المذكور فى المقال

    ردحذف
  8. ما تنكريش برضه ان ليهم فايدة عظيمة
    وهى ان الواحد لما بيقع فى طريق واحدة زيى بتطلع غلبها فيه وغالبا بيطلع حج ويتوب بعدها :D

    sosa

    ردحذف
  9. تمام جداً جداً .. البنى آدم اللى يعمل كده لازم يكون عنده نقص فـ شخصيته بيكمله من وارا الستاره (الإتصالات عن بعد) .. وده غالباً بيبقى الواد اللى مقطع السمكه وديلها بين أصحابه (لكن بالكدب طبعاً) لأنه بيعمل طريقة خداع جميله جداً وهى إنه بيكلم أكتر من بنت قدامهم .. ويركن بالموباييل جنبهم روبعايه كده على جنب أصله بيكلم البت فلانه .. وبعد مايرجع بيزود بقى حبة بهرات كده من عنده :( دانا كنت مع البنت دى إمبارح وحصل .......) ........... إلخ
    حلوه الفكره وطريقة العرض عجبتنى
    تسلم إيدك يا ألاء

    ردحذف
  10. اهلا اهلا ..
    بكرة تلاقي حد باعت لك ع اللي كتبتيه ده
    زي ما حصل معايا :)))

    ردحذف
  11. يا جدعان قولنا الحل لموضوع المعاكسات ده من الاول ان الواحد ميردش على ارقام ميعرفهاش ، ولو فى واحده بتعمل كده بيبقى كل اصحابها واللى يعرفوها عارفين انها مش هترد غير على ارقامهم بس ،ولو اتزنقو وعايزين يتصلو من موبايل تانى بيبعتوا مسج انا فلان او فلانه ردى عليا ,وتتصل من الرقم الغريب .... وحاليا الناس كلها مبتعترضش على اللى بتعمل كده علشان هوا ده الصح فى زمن العجايب
    بس فى ناس طبيعه شغلها وحياتها انها ترد على ارقام متعرفهاش ... دي بقى ربنا معاها وملهاش حل غير تغير الرقم لو اللي بيعاكس ده سيكوباتى وزنان :S:S

    ردحذف
  12. احلى سينما | احدث الافلام العربية والاجنبية والكارتون والمصارعة - شات ودردشة

    http://a7lacinema.com

    ردحذف