اقـــــــــــــرأ

ليه بطلنا نقرا ... ايه ال حصلنا ... ايه ال حصلي انا شخصيا ... ايه ال غير نمط هواياتي من القراءة المستفزة لاي كلمة تقع عليها عيني خلال اليوم العادي بتاعي ... جرنان , المكونات علي علبة اكل , روشتة جوة علبة دوا , كتالوج جهاز جديد, قصة قديمة , ورق الفول والطعمية ,,, الخ الخ ... مفيش حاجة مكتوبة كانت بتقع فريسة لنواضري مكانتش بتنجو من القراية ... لكن دلوقت الموضوع اتغير خالص ... الكمبيوتر دمر تلات اربع هواياتي ... طرابيزة البنج ال مرمية برة علي السلم بقالها سنتين متفتحتش ...ياااااااه كانت ايام ... دلوقت حتي لما احب اقرا كتاب او قصة انزلها بي دي اف واقراها علي الكمبيوتر او حتي الموبايل ... تخيلو ... دة ايه الشلل دة ... فين متعة الكتاب بتاعة زمان ... فين ايام لما كنت بمسك القصة واقعد علي الكرسي بالشقلوب رجليا فوق وراسي تحت ... الدنيا كلها فواااااادي وانا وقصتي فوادي تاني ... وياسلام لما اتزنق ولا حاجة وادخل اكمل قرايتها في الحمام (( ايوة في الحمام دي متعة رهييييييييبة ... جربوها علي ضمانتي )) ... طب ايه ال حصل بقي ... مكل حاجة كانت ماشية تمام وزي الفل ... والقصص ال كانت بتتهرب في الكتاب ايام الثانوية ... تبقي ماسك كتاب الفيزيا الكبير دة والقصة جواه ... وال يعني بتذاكر ... ويخش بابا عليا يلاقيني مركز اوي ... ويندهني مسمعوش ... ويفرح الواد بيذاكر ومنهمك يا عيني ... يوصي ماما تعملي سندوشت كمان بقي ... قصة بالسندوشت ياعيني علي المزاج ... ولا لما كنت اقعد علي مكتبة ماما في الاجازة اقرا كل الكتب ال فيها ... لما خلصت البداية والنهاية 14 مجلد في اسبوع ... مجلدين في اليوم ... وسيرة بن هشام ... وصور من حياة الصحابة ... ورجال حول الرسول ... يا خسارة ... راحت فين ايام السندوشتات دي ... راحت فين ايام القراية ... راحت فين ايام الكتب ... راحت فين الثقافة والعلم ... راحت فين المعرفة والاطلاع ... ليه بطلنا نقرا ... ليه اقتصرت معارفنا علي نشرة الاخبار المملة او الكام خبر ال بنقراهم في المصري اليوم ولا اليوم السابع علي النت ... او الكام لنك المنقولين من مصراوي علي الوول بتاعك او بتاعي علي الفيس ...

انا عايز نرجع نقرا تاني زي زمان ...

انا عن نفسي قررت اخصص ساعتين من وقت الكمبيوتر بتاعي لقراية الكتب حتي لو كانت بي دي اف مش مشكلة بس اقرا ...

اجدادنا العرب الفو كتب كتييير علمية ومفيدة جدا لحد يومنا دة وللاسف الكتب دي مرمية في المكتبات مش لاقي ال يعبرها ويقدرها

لازم يبقي عندنا ثقافة ...

لازم نقرا ...

يللا نرجع نقرا يا جمااااااااااعة ...


شاركنا حملة يللا نقــرا علي الفيس بوك
http://www.facebook.com/pages/yla-nqra/144207455619997

محمود أنور

كـركبة دماغ

يووووه
وبعدين بقى ف الزحمه دي
كل ماأمشي ف حته ألاقي زحمه وكركبه كده
مش عارفه أمشي ولا أتنفس ولا أعمل حاجه يااااااا بشر

طبعا أنا مش قصدي زحمة السير إللي موجوده ف الشوارع
ولا قصدي كركبة موجوده ف الآوضه أو غيره

بتكلم عن زحمه وكركبه جوا الدماغ
ومش معنى كده إن من كتر ما بنعمل حاجات كتير يبقى فيه كركبه وزحمه
لا .. ده فيه ناس فاضيه "زي حالاتي كده" عندهم المشكله دي

أيوا والله .. فاضيين ودماغهم متكركبه
كل ما آجي أعمل حاجه .. ألاقي كركبه أتكعبل فيها
أروح يمين ألاقيها .. أروح شمال ألاقيها
أجي أكتب .. آلاقي زحمه ودوشه وتتـوه مني الآفكار
أجي أدندن كده مع نفسي .. الكلام يهرب مني
آجي أرسم .. ألاقيني مش عارفه أركز وتطلع وحشه .. وأرسم وأمسح وأرسم وأمسح

أووووف بقى .. اتخنقت
أنا لازم أعمل حاجه ف الحكايه دي

قررت أفوكس كده وأهدى شويه
وأبدأ أشوف إيه إللي المفروض يترمى ف الزباله وسط الزحمه دي
وبعدها أكنس أرضية دماغي من الشوائب إللي شكلها وحش
وف الآخر أنفض كل العفره والتراب إللي مالوش لازمه ده
وأشيل بيوت العناكب إللي عششت على حاجات كان لازم تطلع برا من زمان

وأبدأ بقى أرتب كل الآفكار ف ركن
والآهداف ف ركن
والإهتمامات ف ركن
وكل حاجه بقى تاخد ركنها المظبوط

وأفتح بقى الشباك إللي بقاله سنين مقفول ده
عشان الهوا النضيف يدخل
والشمس إللي طول عمري مابحبهاش
تدخل وتموت كل المكروبات دي

آلاء حلمي

ألف مبروك

1000مبروك كتب الكتاب ... وعقبال الفرح الكبير

ألاء : 

مبدئياً أنا الفرحه مش سايعاني هو أي نعم فيه مآسي ف الدنيا و ياما الواحد شاف بس وحياة الكشري إللي أكلناه عند شوقي أنا فرحانه ولو كانو سابوني أقوم أرقص كنت هارقص ف قلب الشارع ومش مهم بقى بريستيجي ومنظري والكلام ده
كل السعاده دي لحبيبة قلبي هند نبيل
صحبتي وأختي من أيام الجيزه...معرفة 4 سنين ...
عايزه أباركلها على خطوبتها وكتب كتابها...

وعايزه أقولها 1000 مبروك

وبجد كان نفسي أكون موجوده

بس إحنا لما اتقابلنا عملنا الواجب

وفرجنا علينا بورسعيد ع البحر

بجد أنا فرحانه فيكـ.... أ أ قصدي ليكي

وسمعوني أحلى زغروطه لآحلى بنوته بقى

أختك الصغننة : ألاء حلمي

محمود :

احم احم ... 1..2..3... الوو ... وسمعني احلي صدي صوت ... الشامبوهندز محمود ...يعني الادمن ... يعني المخوفتية ... يعني اجدع ناس ... يعني اجمل اوقات ... يعني احسن صحاب ... يعني احلي حفلات عيد ميلاد وخطوبة وجواز من متعهدة الحفلات ... عروستنا النهاردة ... وسمعني سلام عروستنا بيضا ...

((فاصل موسيقي))

متتصوروش احنا فرحانين ازاي ... مش انا بس ... كل الناس ... كل صحابها ... كل الناس ال اتعاملو معاها ... رغم اني معرفتي ليها كانت علي المنتدي وبس ... لكن اشهدلها بجد انها من الشخصيات المميزة جدا ال عرفتهم علي النت ... واللي عرفتهم في حياتي كلها ... الف مليون مبروك يا هند ... كان نفسنا نعملك حفلة زي حفلاتك ... بس اكيد مش هتطلع حلوة زي حفلاتك ... الف مبروك مرة كمان وربنا يتمملك علي خير ويسعدك يارب

اخوكي الصغنن : محمود أنور

ارحمـــــــونـــــا !!

رمضان بدأ ... وعدا منة خمس ايام كمان ... وانا لغاية دلوقت قاعد متقوقع في البيت 

... اولا : احترازا من الشمس والعطش الشديد ...

ثانيا : نتيجة الام في البطن معرفش سببها ايه ...

ثالثا ودة الاهم : حفاظا علي صيامي ... معرفش البنات بيجرالها ايه في رمضان ... زي ميكونو مستنيين الشهر عشان يبوظو صيامنا ... هما صحيح مش عاتقينا في رمضان ولا غيرة ...بس الاستفزاز بيبقي علي عينه في نهار رمضان ... تلاقي الالوان الفاقعة كلها ظهرت والمحزق والملزق واللي فوق الركبة واللي تحت الوسط وحجات غريبة عجيبة ... الأغرب ان النسبة بتزيد مش بتقل مع ان المفروض ان شهر رمضان دة شهر الطاعات واللي بيعمل معصية عموما بييجي في الشهر دة ويلم نفسة ...لكن ال بيحصل العكس ... والاستفزاز لينا احنا الشباب الغلبان بيحصل جهارا نهارا في عز الصيام ... طب حد يقولي انا ذنبي ايه لما احبس نفسي في البيت كدة ... شاب غلبان قدامة بتاع 150 سنة علي ميكون نفسة ويبقي قادر علي الزواج ومصاريف المعيشة يشوف المناظر العجيبة دي في رمضان او غيرة ... ومش كفاية الكبت اللي هو عايش فيه ... تحس ان البنات جيين علي الجرح وعمالين يدوسو ... سواء بلبس او بتصرفات او بغيرة ... والواحد دلوقت عشان يغض بصرة في الشارع هيمشي مغمض ... او يعمل زيي ويتقوقع في البيت احسن :$ ... طلب بسيط من القلة القليلة المستفزة من البنات :D

ارررررحمووووووووووووووونا :@

انا عارف ان احتمال اتضرب النهاردة :D

كل سنة وانتو طيبين ... رمضان كريم :)

محمود أنور

حبـــة تفـــاؤل

الحكايه ومافيها
بتمر علينا في حياتنا شوية أزمات وظروف صعبه
بتخلينا نكره العيشه باللي فيها
وساعات بتوصل مع ناس انهم يفكروا في الإنتحار
طبعاً ماقدرش ألوم حد بيمر بالكلام ده لإن محدش يعرف إللي قدامه احساسه عامل ازاي وقتها
المهم .. ليه مانغيرش النظره السوداويه دي شويه
ونحط الألوان إل احنا بنحبها وعلى طريقتنا
وبالتدريج الحكايه هاتبقى زي الفل ان شاء الله
أنا معاكو فإن وقتها بتبقى نفسكو مسدوده عن أي حاجه .. ودي طاقه سلبيه
بتأثر بالسلب علينا وبتخلينا نكتئب
بس ليه مانحولش الطاقه السلبيه دي لطاقه ايجابيه نستفيد بيها
ندور على هوايه بنحبها ونعملها
أي رياضه .. أي فن .. أي نشاط .. المهم تكون حاجه بنحبها
ونبدأ نفجر طاقتنا السلبيه فيها بدل مانقعد ناكل في نفسنا ونتخنق ونكتئب

هانروح بعيد ليه .. أنا مثلاً واحده من الناس إللي بتمر بأزمات مش حلوه
كنت الآول مابقدرش أقاوم أي خنقه وكنت بتأثر بسرعه وأقفل على نفسي
بس لقيت ان الموضوع ده مالوش أدنى لازمه
وإن مفيش حاجه تستاهل
ومادام لسه حواليا ناس بتحبني وبحبهم يبقى الحياه حلوه جداً
ولقيت نفسي بمسك القلم والاسكتش وبرسم
وخلال الكام يوم إللي الطاقه السلبيه أثرت عليا فيها وحولتها لإيجابيه
قدرت أطور من رسمي ف حته ماكنتش بعرف أعملها أبداً في حالاتي العاديه
إللي عايزه أوصله ليكو .. إن كل الحكايه متلخصه في إزاي نتعامل مع نفسنا
وإزاي نسيطر عليها ومانسيبهاش هي إللي تسوقنا لحاجات مش كويسه وهاتضرنا
كلنا لازم نغسل نفسنا من الحاجات إللي مالهاش لازمه في حياتنا
بشوية تفاؤل وشوية حب ليها .. ونفهم إحنا عايزين إيه بالظبط
لإن كل حاجه في حياتنا إختيارات إحنا إللي بنحددها

ألاء حلمي

اوووعى تـفـــــــكـر

هو دة الحل لكل مشاكلنا في البلد دي ... اصل كل الواحد ميفكر في حاجة يتخنق ويتشل ... ومشكلتي الازلية اني دائم التفكير

كل ملاقي وقت فاضي اقعد افكر ... والحمد لله الاوقات الفاضية بالنسبالي مفيش اكتر منها ... خصوصا وقت المواصلات اليومي اللي بيتجاوز الاربع ساعات اتنين رايح واتنين جي

والمواصلات بالذات بقي بالنسبالي بيئة مشجعة جدا للتفكير وخصوصا المكروباص حبيب قلبي

تخيل كدة انك تفضل قاعد في المكروباص المصون من حلوان لحد متوصل عباس العقاد لمدة تصل الي الساعه مبتعملش اي حاجة غير انك تفكر لحد مدماغك تبقلل من التفكير

للاسف انا معظم افكاري ذكريات من الماضي ... ومعظمها يإما ذكريات سودة ... يإما ذكريات بمبي وقلبت باسود ومهبب في الاخر ...

عشان كدة قررت مفكرش في الماضي لان التفكير في الماضي بيخنقني

وبدأت افكر في الحاضر ... يادي النيلة بتخنق برضة ... هو في ايه عدل دلوقت ... تيتيت تيتيت ... استنو استنو جالي مسج ...برب :D

يادي فودافون ... لازم تحرقو دمي ... خلاص عرفت ان اخر عربية ميني كوبر واخر سحب واخر زفت ... ال يعني انا اللي انتو مستنيينو عشان يكسبها

دة انا اكبر حاجة كسبتها في حياتي كانت ازازة ريحة ب10 جنيه واتكسرت :(

المهم نرجع لمرجوعنا التفكير في الحاضر ... ماشاء الله بلدنا بتتقدم بينا ... وجمال هيبقي الريس ... وبيدو فرصة للشباب اهو هنبقي رؤساء ووزرا وحرامية كبار قريب وهننهب البلد زي الناس الكبيرة معملت :D

بذمتكو مش اخبار تفتح النفس ... لا وايه مصر بعتت طيارتين اغاثة لباكستان عشان تساعدها ضد الفياضانات ... الظاهر معندهمش خلفية ان مصر محتاجة تلاتين طيارة عشان يغيثو المنكوبين ورا ماسبيرو والغرقانين في فيضانات الصرف الصحي في المناطق الشعبية النائية بالقاهرة :D

وكل شوية البورصة تطلع البورصة تنزل والسكر يغلي واللحمة تغلي والمواصلات تغلي 

اموت واعرف ليه المرتبات مبتزيدش زي الاكل ... وياتري فلوس الحاجة ال غليت دي بتروح فين ... طب بلاش افكر في الحاضر ... انا ماشاء الله باشمهندس قد الدونيا ... خليني افكر في المستقبل شوية ... بيقولو قدامي مستقبل مشرق ... يعني خلاص كلها سنة واتخرج ... واخش الجيش غالبا هلبس تلات سنين ماشاء الله اخرج من الجيش عندي 26 سنة ... وابقي حديث تخرج عندي 26 سنة اشتغل ب 1000 جنيه في الشهر المفروض اني احضر دراسات بيهم واتجوز بيهم واروح الشغل بيهم ... ايه الهنا دة كلة ... يا تري مكروباص حلوان مدينة نصر هيفضل ب 3 جنيه بس ... اكيد ساعتها هيبقي بخمسة ... يعني الالف جنيه حتي مش هيكفوني مواصلات ... الواحد حتي لو حاول يعمل شوية حجات من الحجات دي في ايام الرخص ( ال هما اليومين دول ) ... ايوة رخص طبعا امال ايه ... انت لسة شفت حاجة ... هحكيلكو بعدين ايه الحجات ال حاولت اعملها في ايام الرخص ومعرفتش برضة :(

ييييييييييييييييه مسز تاني برب :$

الظاهر صحابي انقرضو محدش بيبعتلي رسايل غير فودافون

انا بفكر ابعتلهم رسايل اعيد عليهم بمناسبة رمضان ...

افكر اييييييييييه انا مش هفكر تاني خلااااااااااااااااااص

محمود أنور