الجمعة، 22 أكتوبر 2010

الإستعمار الذي لن ينتهي مؤقتاً إلا بدخول الشتاء


مع دخول صيف السنة دي .. بدأت أحس إن فيه حاجة مش تمام بتحصل
شوية شوية ولقيت هجمات خفيفة من تحت لتحت
ماكنتش حاطة في بالي إن الموضوع هايكبر ويوصل للحرب

الموضوع دة اكتشفته من فترة
بدأ بالمطبخ وبالتدريج انتشر في كل البيت
الحكاية كانت بتزيد كلما زادت الضحايا من بقايا الاكل
فجأة من غير مقدمات ألاقي جيوش اترصت وهجمت ولمت الليلة بسرعة بسرعة واختفت

وأما ابتديت أقلق من الموضوع دة عشان التضاعف الغريب كان سريع
وكانو بيقضو على كل اللي يقابلهم
لدرجة انهم كانو بيهجمو ع اللي في ايدي كمان .. فراغة عين
قررت أكلم السطات العليا (والدي العزيز) وأشرحله إننا في موقف محرج
وان الحكاية هاتخرج عن السيطرة
وكان الرد ودن من طين و ودن من عجين

بس أنا ماسكتش .. قولت مابدهاش بقى .. أنا هاعرف أتعامل .. وطبعاً كانت دي فزلكة مني
بدأت أشن هجماتي أنا كمان إللي كانت في منتهى الغباء
غرقتهم مياة .. و دوست عليهم بالشبشب و عملت فيها جندي مجند مقنع ودخلت أحارب بالمبيد
وفشلت فشل ذريع محطم للآمال

فـقررت أعمل وقفة احتجاجية بإن لآ بقى كدة كفايــــة
ووقفت في قلب الصالة أقول : يا رجالة ... يارجاااالة إحنا ممكن نفررررط في أي حاجة
أااااااااااااي حاجة إلا الحرية
وما إن انتهيت من الجملة إلا ولقيت المخدة لازقة في وشي ووراها جملة : بس يابت عايز أسمع النشرة

لميت نفسي واتركنت على جنب
ومن غيظي الشديد بقى لما لقيتهم ماليين علبة اللوبيا ومخرمينها
حتى اللوبيااااااااا ماعتقـتوهاش ..! طب والله لا أفتح عليكو المياه السخنة ياولاد الآفاعي
وأخليكو عبرة لمن يعتبر .. بس طبعاً ولا أثّـر
واللي نجى منهم نزلو يجرو على الأرضية زي القرود
أعمل فيكو إيييييه ...!؟ أربي آكل نمل عشان أرتااااااااااااح

في الآخر قررت أستسلم بقى وأرمي طوبتهم
وبكرة الشتاء ييجي ويتلمو في البيات الشتوي



آلاء حلمي

هناك 7 تعليقات:

  1. هههههههههههههههههههههه
    ربنا يوفقك في الشتا بقى

    ردحذف
  2. هههههههههه
    شكل أنا اللي هاعمل بيات

    ردحذف
  3. انتي غلطانة اصلا
    المفروض تعملي جيش احتياطي
    ويبقى ع اعلى مستوى كمان
    D:

    ردحذف
  4. اسماء عفيفي22 أكتوبر 2010 9:34 ص

    شتا ميييييين هو الشتا ناوى ييجى ده انا النمل مطلع عينى السنادى والسنه الى فاتت كمان كل مدخل الحمام الاقى جنب الباب رمل اشيله ييجى كتييير وانا هتجنن بييجى منيييييين ده الاقيه من النمممممممممممل والله خايفه ليهدو البيت فوق دناغنا :D بس هو انا طول مسلاحى فايدى ملهمش عين يتكلمو هو بعد كل مسحه رشة كيروكس فالاركان واهو مستنيين امتى ييجى الحاج شتا علشان النمل يغور مع انى مبطقش الشتنا بصراحه

    ردحذف
  5. ههههههههههههههه

    فعلا النمل بقي مشكلة كبيرة خصوصا السنتين ال فاتو

    اقولكو حل حلو اوي

    ربو صراصير تاكل النمل :D

    ردحذف
  6. اه والله يا لولو انتى جيتى ع الجرح
    تقريبا انا الوحيده فى العالم اللى بتعانى من فوبيا النمل
    بتسررررررررع وبجرى من ادامه
    لو دخل الحمام عندنا بقاطع الحمام لحد مايسيبوه حتى لو كنتت فى اشد الحاجة له:((

    واللى اتنيل زاد وغطى انى مابقتلوش
    مش عارفه بقى بيصعب عليا ولا بستحرمها ولا بخاف ولا بتلبش مش عارفه
    ولو قتلت نمله غصب عنى ببقى هعيييييييييييييط واقول ياترى عندها اطفال وكانت رايحه توديلهم الاكل:(((
    يعنى لا عارفه اقتلهم ولا عارفه اتعايش معاهم:(((

    ردحذف
  7. هههههههههه

    بجد حاجة مزعجة !!

    ربنا معاكِ :)

    ردحذف