الخميس، 9 ديسمبر 2010

بابا ... : إحنا ليه مش صحاب ..!؟


أنا عارفة انك راجل عظيم جداً
بتشتغل و بتتعب عشان تجيبلنا كل إللي عايزاه
وقت مابتعب ووقت مابفرح مابتقصرش
و ف المناسبات كمان بتعمل الواجب و زيادة

بس مش ده بس إللي أنا محتاجاه
أصل أنا أوقات كتيرة بأحس إنك مجرد بنك
بأسحب منه فلوس كل ما أحتاج
ماهو انت أبويا مش عشان كده بس

أنا بجد نفسي تقعد معايا شوية
تيجي تسألني كل يوم عني وتنكش ف تفاصيلي
أصل أنا مابعرفش أجي أحكيلك
لا تكون جاي من الشغل متدايق

أنا عارفة إنك دايماً مشغول
ولما بترجع البيت بترجع عشان تريح أعصابك
فهاتبقى بواخة مني لو قابلتك بمشاكلي

ساعات باستغرب هو احنا ليه مش صحاب
بس دايماً بلاقي مبررات أقنع نفسي بيها انك انت السبب
ماهو أصلك ماتعرفش ان الصحاب مابيقفشوش على بعض
لما بيحكو ويشكو لبعض
وأنا كل محاولاتي ف اني أقربك مني و أحكيلك على حاجة
يااما مابتعجبكش وتتدايق مني
يااما مابتفهمنيش كويس
فـبتقفل منك

أنا مش قصدي أدايقك بكلامي ده
ولا حتى قصدي يكون فيه تقليل من احترامي ليك

بس عارف انت لما حد يبطل حاجة
عشان مابيتسمعش أو مابياخدش الاهتمام إللي متوقعه
أهو كده بالظبط

طب انت عارف بقى
أنا عارفة عنك حاجات أكتر من الحاجات إللي انت تعرفها عني
مع ان المفروض يكون العكس .. بيتهيألي يعني

أقوللك على حاجة كمان
انت مابتاخدنيش ف حضنك غير ف الأعياد
وده بيطبع عليا أنا واخواتي .. محدش فينا بيعمل كده
وزعلان عشان بعاد عن بعض

شوفت .. أدي مبرر أهو

ماتزعلش مني بس لو فاكر انك بتحاول تصاحبني
كل فترة و التانية
فانت غلطان
وماتزعلش مني لما تسألني "مالك..؟" .. وأقوللك : مفيش

فيه حاجات كتيرة باعتبرها أساسيات بالنسبالي
انت مابتعملهاش

بس عارف ... أنا بحبك أوي



آلاء حلمي

هناك 9 تعليقات:

  1. حلوه اووووووووي

    ردحذف
  2. انا عاجبنانى كلها الا الجزء الاخير منها! كل واحد لازم يكون واضح فى تحديد مشاعره الحقيقة تجاه المشاكل اللى بتقابله, يعنى لو انا عندى كل المشاكل دى من ناحية بابا. لما اقول انى لسه بحبه, انا اعتقد انى حابب معنى او صورة الاب فى حياتى, لكن كلامى بيثبت انه مش هو دا الاب اللى فى خيالى..
    اذا اى شخص ما احترمش قيمة وجود ناس بيحبوه فى حياته فهو ما يستاهلش الحب دا حتى لو كان مزيف! لازم يفهم ان فيه مشكلة حقيقية مش مجرد احساس مؤقت, حتى لو أثر عليه. الصراحة مفيدة اكثر من التجاهل.
    جميلة جدا.. استمرى

    ردحذف
  3. حلوة, بس يارب ماتبقاش حقيقة في حياة اي حد

    ردحذف
  4. وصفتى كل الى عايزه اقوله
    بس انا خلاص بقه اتعودت ويمكن لانى بعدت بعد الجواز مبقاش بيفرق معايا
    تصدقى بابا لما كان مسافر موحشنين
    يمكن لان وهو كان موجود مش قريب منى ومعرفش عنه حاجه
    نفسي منكنش كده مع اولادنا وبنحاول والله
    الله المستعان

    ردحذف
  5. ممممم

    مؤسف!!

    ردحذف
  6. الاباء والابناء معذورين فى هذا الزمان

    ردحذف