الخميس، 11 أغسطس 2011

شحططة بـــعد التـــخرج ... ج1


ازيكووو ... ؟؟
عاملين ايه ..؟؟
وحشتوني اوي ... بقالي كتيييييير مكتبتش .... من امتحانات الترم الاولاني
صحيح هيييييييه اخيرا اتخرجت ... وكتبنا الكتاب وعلينا الجواب ... يللا عقبالكم جميعا
الدنيا دي بتجري بسرعه اوي ... فجأة قامت الثورة ... فجأة مبارك مشي ...فجأة المجلس العسكري بقى حامي الثورة ... فجأة مصر بقت متقسمة وبقى في احزاب واخواني ولبرالي وسلفي ويساري وجنوبي وبطيخي .... فجأة امتحنا ... فجأة زنقونا في المشروع ... هوبااا اتخرجت ... ياخبر بقيت مهندس ... فجأة ودعت العزوبية ... وبقيت مسئووووووو....... 
.
.
.
.
.
.
.
.
.
عشان كلمة واحدة بتفرق كتير ... بيبسي وفودافون ادولك 10 دقايق في كل ازازة .... تييييييييييييييت
يللا مهي ناقصة ذل :@


المهم بدأنا مشاوير الجيش ... حاجة اخر قرف ... احنا نخلص يوم 27 ويقولك اخر معاد للكشف يوم 3 في الشهر ال بعده
طب ازااااي النتيجة لسة مطلعتش ... من اولها هرتلة ... وتجررري تخلص ورقك تروح القسم يقولك الفيش هياخد اسبوع على ميطلع لو مستعجل روح العباسية ... وتطييير على العباسية ... يااااااااااااخبر هي مصر كلها جية تعمل فيش ولا ايه ... كل دي بشر ... طابوووور طويييييييل قدام الادلة الجنائية ... وقفت في الطابور لحد متوصل للباب ... الحمد لله ادوني ورقة فيها رقم (1050) ... مبصتش في الرقم ... دخلت جوة لقيت طابوووور طوووووووويييييييل تاني ... أم البلد بتاعه الطوابير دي ... تقف ... تسجل اسمك ... روح عند التفييش بقى ورا المبنى دة ... اييييييه كل الناس دي ... بينادو بالرقم ... مين جوة ... رقم كام ... ايييييه ... كااااااااااااااااام !!! رقم 670 :(((((
لا بقى حرام ... اقعد استنى بقى ... تستنى عدد مهول من البني ادمين بيعملوا الفيش معاك في نفس ذات الوقت ... لمدة 4 ساعات ونص لحد مييجي دورك ... مع كم مهول من الخناقات والزعيق والقرف والمشاكل مع العساكر ال بيدخلوا ناس بالكوسة ... ثورة ايه بقى ... جتكو القررررف
المهم الحمد لله خدت الفيش بعد عناء ورجعت تاني القسم ... لا يا معلم فوت علينا بكرة شطبنا
روحت البيت مفرهد ومقتوووووول ... بابا فتحلي : حمد لله على السلامة كل دة
الضحية : أنا عايز ارجع الكليــــــة تااااااااااااااااااني :((((((
بابا (بابتسامة غير مفهومة) : انت لسة شفت حااااااجة :D


تاني يوم أول يوم رمضان :(
صحيت بدري ... جرررري على القسم ... هات فصيلة دم وفيش وقيد عائلي واربع صور من غير شعر ولا دقن ولا سوالف ولا بق ولا عينين ولا مناخير ولا وش .... :(( 
رحت عملت ام فصيلة الدم ... ورجعت القسم ... لا شطبنا تعالى بكرة ... تعالى فين انت قلتلي بتخلصو 1 
-ايوة بس بنخلص الفيش العسكري 12 عشان نسلمهم في العباسية الساعه 1 .. مليش دعوة مش ماشي الا لما اعمل الفيش ... قالي شوف ال هيفيشك مفيش حد اصلا الناس مشيت ... ازاي بقى مش معادهم للساعه 12 ..؟؟
-اه بس اول يوم رمضان بقى كل سنة وانت طيب
-يعني هو رمضان تعطلو فيه مصالح الناس ... وبعدين دي مش مصالح دة انتو ال عايزيني :(
تخش تدور على حد لغاية متعتر في واحد ابن حلال يروح يوصي العسكري ... يقوم يتنازل ويقبل يفيشني ...(هو يعني ايه يفيشني دي ... مش عارف ليه حاسسها كلمة قليلة الادب :$)
المهم ترجع للعسكري ... وبمنتهى القرف : فين ورقك
-أهو ... عايز ايه بالضبط انتو طالبين ورق كتير
-(بمنتهى القرف برضة) : انت مش عارف ورقك ... وخد مني الورق وقعد يلعب فيه ... وبعدين قالي فين المؤهل ... قلتلة لسة النتيجة مطلعتش وعايز اخلص الورق عشان الحق اكشف قبل اخر معاد بعد بكرة
قالي ملكش عندي ورق غير لما تجيب المؤهل ...
اللهم طولك يا روح ... النتيجة لسة مطلعتش اصلا ... ان شالله معن أهلها طلعت ... وقت متطلع ابقى اروح اجبها واللي يحصل يحصل
المهم المعاد بتاع التجنيد اتمد لحد 20-8 عشان الناس ال زي حلاتي ...(يحرقكو بجاز :@ :@ يعني انا اروح العباسية واستنى كل دة واعمل فيش مستعجل عشان تمدوا الكشف ... مكنت عملتة من القسم ويطلع وقت ميطلع وخلاص ... متقولوا من الاووووول :@ :@)


اليوم التالت (الخميس 4-8)
في اخبار ان الناس تقدر تروح الشؤون تقدم على بيان النجاح ... عشان التجنيد ... يا مسهل يارب
صحيت بدري ورحت الكلية ... كالعادة زحمة وقرف ... وعلى موصلت للشباك تقريبا كنت لابس الكاب بس :D
خدت ورقة ... املاها ... اكتب التاريخ ال عملت فيه التربية العسكرية ... مش فاكر ... كانت في سنة اولى ... قعدنا نجيب يمين وشمال لحد مخمنا التاريخ وحطيناه ... سلمت الورقة ... خلاص تعالى يوم الحد 
سبتهم الحد والاتنين ورحت التلات ... ها فين البيان ... لسة مجتش من التربية العسكرية .... حراااااااااام بقى انا صاحي 7 الصبح ونايم بعد الفجر ورمضان والحر دة واضرب مشوار ساعتين عشان تقولي لسة مجتش ... دة كان معادي الحد
الموظف بكل برود : فوت علينا بكرة ...
روحت البيت وانا بسب وبلعن ... الله يحرقكو :@
اكلم واحد صاحبي يقولي انا رحت الحد وخدتها الاتنين ... يابن اللذينة ... قعد يعيطلهم راحو عملوهالة بسرعه ... يعني انا هموت وافهم ... لما الحاجة ممكن تخلص علطول ... ليه القررررررف دة
استعنت بالله ورحت تاني يوم ال هو النهاردة بقى 10 رمضان ... يارب انصرني بقى :((
وصلت الكلية ... زحمة غريبة ... ام الزحمة على ام الحر في الصيام دة ... وحرب بقى على موصلت للشباك ... اسال الموظف ... اسمك اتنده ... طب وبعدين ... خلاص ورقتك جت ... هنعملك الافادة ... تعالى يوم الحد :|
-حد ميييييييين انا مسافر بعد بكرة انا مش ماشي من هنا الا لما اخد الورقة دي حاااااااالا (نسيت اقولكو .. انا رايح مطروح الاسبوع الجي ... عقبال عندكو :D )
وخناقة بقى وكلة بيتخانق وجه العميد واتخانقنا معاه ومع الموظفين وفي الاخر خدت الورقة ال دوخوني عليها
اخيـــــرا ... معايا ما يثبت اني بقيت مهندس ... 
هروح بكرة بقى اعمل الفيش العسكري واخد معاد الكشـــف بتاعي ... 
ادعووووووووووووووووووولي .... مش عايز اجي من مطروح مخصوص ويضيعو عليا الاسبوع بسبب المسخرة بتاعه الموظفين دي
.... ثورة ايــــه دي ... دة الناس سلوكياتها بقت أســـوأ :(
وللحديث بقيــة ... ان كان لينا عمر يعني ... إشطة ؟؟ :D
ان شاء الله :)


محمود أنور

هناك 10 تعليقات:

  1. ههههههههههه فوت علينا بكره ..وصله ياصبحي فكرتني باغنيه اروح لمين واقول يامين D:دار روتين ممل الموظفين دلو مش هايتغيرو لا وفي نفس الوقت تلايهم بيتكلمعن الثوره زي ماتكون بنت اختهمD:هههههههههه ربنا معاك ويوفقك ياباش مهندس :))وعقبال اما نتبهدل زيك كدا بس انا الحق اصيع وازأطت شويه في الكليهD:
    .zahraa eleash(eye cry)

    ردحذف
  2. ايه يابنى الذل اللى بيذلهولكو دا

    بس اعتقد بيعودوكوا على ماتروحو الجيش وتشوفو الشغل اللى على حق :D :D

    ردحذف
  3. @زهراء
    والله حاجة مملة وتقرف ... ربنا يخلصنا منها على خير :(

    ردحذف
  4. ولسة تلات سنييييييين يا توووووفيييييييييق :((

    ردحذف
  5. شد حيلك كلنا لها

    ادى اخرة الهندسة وعمايلها 5 سنين ذل ومش كفاية :(

    ردحذف
  6. يا مساء الفل
    حمدا لله ع السلامة ..
    كل سنة وأنت طيب بقي يا باشمهندس عريس


    فعلا الوقت مرة بسرعة , والوقت عندك أنت سريع جدا
    حاجات كتيرة مرة واحدة كدة
    مخلص أنت دايما .. وعلى طول مستعجل !!!

    بخصوص الشحططة :
    اهلا بيك في بلدك .. مصر !

    مستنينك لما ترجع من مطروح بقي
    :)

    ردحذف
  7. الشدة على الله .... ربنا يسهلها وييسرها يارب :(

    ردحذف
  8. @doha

    يا مساء الشقى

    الله يسلمك
    وانتي طيبة يا بشمهندسة يا عروسة :D

    اه والله مليون حاجة في نفس الوقت ... يللا الحمد لله

    اهلا بيكي ياختي

    الدور على اختك بقى :D

    ردحذف
  9. أحسن ... تستاهل :P

    ردحذف