الأربعاء، 1 سبتمبر 2010

صـلة الرحـم



كالعاده كنت قاعده ملزوقه قدام الكمبيوتر
وأختي بتتفرج على عمرو خالد
وعادةً بكون قاعده مابسمعش حاجه ع الجهاز
فـ برمي وداني مع التلفزيون وأسمع الراجل الطيب ده

من كام يوم كده بقى
كالعاده دي ... إللي سبق ذكرتها من فسوه
سمعته بيتكلم عن حاجه زي دفى العيله
وإن لازم البيت يكون قريب من بعضه
والآهل كمان يكونو قريبين
أياً كان يعني ... هو كان بيتكلم ف حاجه زي دي

الموضوع ده شدني جداً
لإن أغلب البيوت بقت بارده
كل واحد في وادي لوحده

صلة الرحم مابقتش موجوده إلا نادراً
أو بمعنى أصح ف المناسبات
ده حتى المناسبات مابقاش ليها طعم

وقت اللّمه ... مفيش لمّه حقيقيه
وقت الكلام ... مفيش كلام مفيد

كل واحد مشغول بحياته
كل واحد مش فاضي للتاني
ده حتى التلفونات اتقطعت

بقت أي زياره .. أي عزومه .. أي تجمع عائلي
عباره عن مجرد روتين بيتعمل على مدار السنه

بالنسبالي .. بحاول ما أنشغلش عن أهلي
وبروح من الوقت للتاني عندهم
بحاول أسمع لإخواتي واقعد معاهم

وزي ما الراجل الطيب قال : لازم تدور على حاجه مشتركه بينك وبين أهلك
عشان العلاقات بينكو ماتتقطعش
أي حاجه مشتركه بينك وبين أخوك أو أختك أو أمك وأبوك

لازم ناخد أجازه ونخرج نغير جو مع العيله
عشان احنا اتعودنا اننا نخرج نغير جو مع الصحاب

عايزين نكسر الحاجات إللي اتعودنا عليها دي بقى
أو على الآقل نوزعها صح وخلينا احنا إللي نبدأ بكده
وزي مافيه ساعه للصحاب .. نخلي فيه ساعه للآهل كمان


آلاء حلمي

هناك 5 تعليقات:

  1. بقت أي زياره .. أي عزومه .. أي تجمع عائلي
    عباره عن مجرد روتين بيتعمل على مدار السنه


    والله ولا حتي الروتين دة بقي موجود

    كلة مفقود مفقود :(

    ردحذف
  2. كتير بعذر الناس لانشغالهم بهموم الحياه
    وان كان ده غلط بصراحه بس هو ده الواقع
    يعنى مع اننا شباب لكن بردو ف كلياتنا مش فاضيين

    وشئ تانى الواحد مننا مثلا بيطلع بيلاقى العيله مثلا بتاعته ده فى مشاكل مع ده وده مش فاضى يشوف ده فاانت بتطلع مش عارف كل قرايبك عشان تصل رحمهم ولو رحت ممكن تلاقيه مش عارفك اساسا انما على مستوى الاعمام والاخوال اظن المعظم بيصل رحمه

    موقف بسيط اذكره كنت ف اسكندريه عند قرايبنا فلقيت واحد منهم بيوقلى بئه انت يامحمود تبقى هنا ومتجيش انا زعلت جدا ......قلت له انا اسمى احمد مش محمود
    فتخيل موضوع صله الرحم نفسه بئه حاجه كده شكليه

    الدنيا اخدتنا من بعض جدااااااااااااااا

    واتمنى نهتم بصله الرحم دا حاجه ف دينا مش مستحدثه ولا حاجه

    الموضوع جميل وشكرا ع التذكره واسف للتطوييييييييييل

    ردحذف
  3. ولا تطويل ولا حاجه
    وشكرا ليك انت..

    بس خلينا بعيد عن المشاكل والكلام ده
    المفروض عشان نعمل صلة رحم
    ماتكونش من طرف واحد بس
    لا .. دي حاجه متبادله

    انتهز اقرب فرصة تجمع عائلي
    واتناقش معاهم ف الموضوع

    ردحذف
  4. حب الذات والانانيه دي صفات بتتولد مع الانسان
    في اللي بيعرف يتغلب عليها ويحب اللي حواليه
    وفي اللي حبه لذاته ولمصلحته اهم حاجه عنده ف حياته

    ردحذف