السبت، 28 أغسطس 2010

اقـــــــــــــرأ

ليه بطلنا نقرا ... ايه ال حصلنا ... ايه ال حصلي انا شخصيا ... ايه ال غير نمط هواياتي من القراءة المستفزة لاي كلمة تقع عليها عيني خلال اليوم العادي بتاعي ... جرنان , المكونات علي علبة اكل , روشتة جوة علبة دوا , كتالوج جهاز جديد, قصة قديمة , ورق الفول والطعمية ,,, الخ الخ ... مفيش حاجة مكتوبة كانت بتقع فريسة لنواضري مكانتش بتنجو من القراية ... لكن دلوقت الموضوع اتغير خالص ... الكمبيوتر دمر تلات اربع هواياتي ... طرابيزة البنج ال مرمية برة علي السلم بقالها سنتين متفتحتش ...ياااااااه كانت ايام ... دلوقت حتي لما احب اقرا كتاب او قصة انزلها بي دي اف واقراها علي الكمبيوتر او حتي الموبايل ... تخيلو ... دة ايه الشلل دة ... فين متعة الكتاب بتاعة زمان ... فين ايام لما كنت بمسك القصة واقعد علي الكرسي بالشقلوب رجليا فوق وراسي تحت ... الدنيا كلها فواااااادي وانا وقصتي فوادي تاني ... وياسلام لما اتزنق ولا حاجة وادخل اكمل قرايتها في الحمام (( ايوة في الحمام دي متعة رهييييييييبة ... جربوها علي ضمانتي )) ... طب ايه ال حصل بقي ... مكل حاجة كانت ماشية تمام وزي الفل ... والقصص ال كانت بتتهرب في الكتاب ايام الثانوية ... تبقي ماسك كتاب الفيزيا الكبير دة والقصة جواه ... وال يعني بتذاكر ... ويخش بابا عليا يلاقيني مركز اوي ... ويندهني مسمعوش ... ويفرح الواد بيذاكر ومنهمك يا عيني ... يوصي ماما تعملي سندوشت كمان بقي ... قصة بالسندوشت ياعيني علي المزاج ... ولا لما كنت اقعد علي مكتبة ماما في الاجازة اقرا كل الكتب ال فيها ... لما خلصت البداية والنهاية 14 مجلد في اسبوع ... مجلدين في اليوم ... وسيرة بن هشام ... وصور من حياة الصحابة ... ورجال حول الرسول ... يا خسارة ... راحت فين ايام السندوشتات دي ... راحت فين ايام القراية ... راحت فين ايام الكتب ... راحت فين الثقافة والعلم ... راحت فين المعرفة والاطلاع ... ليه بطلنا نقرا ... ليه اقتصرت معارفنا علي نشرة الاخبار المملة او الكام خبر ال بنقراهم في المصري اليوم ولا اليوم السابع علي النت ... او الكام لنك المنقولين من مصراوي علي الوول بتاعك او بتاعي علي الفيس ...
انا عايز نرجع نقرا تاني زي زمان ...
انا عن نفسي قررت اخصص ساعتين من وقت الكمبيوتر بتاعي لقراية الكتب حتي لو كانت بي دي اف مش مشكلة بس اقرا ...
اجدادنا العرب الفو كتب كتييير علمية ومفيدة جدا لحد يومنا دة وللاسف الكتب دي مرمية في المكتبات مش لاقي ال يعبرها ويقدرها
لازم يبقي عندنا ثقافة ...
لازم نقرا ...
يللا نرجع نقرا يا جمااااااااااعة ...


شاركنا حملة يللا نقــرا علي الفيس بوك
http://www.facebook.com/pages/yla-nqra/144207455619997
محمود أنور

هناك 22 تعليقًا:

  1. يلااااااااااااا...

    أنا عايزه أقرا أنا كمان
    بطلت أقرا من فتره
    وفيه حاجات كتير أوي بسمع عنها
    او معلومه عرفتها
    وببقى عايزه أدور وراها
    بس هو الكسل اللعين ده

    ردحذف
  2. فعلاااااااااااا عندك حق الناس نسيت القراية والكمبيوتر والنت دول بقوا بيضيعوا وقت كتير قوووووووووى حتى لو بنقرا وأحنا عليهم بس بنضيع قصادهم وقت أكتر بكتير من وقت القراية
    والقراية عامة من كتاب أو جرنان أو أى حاجة ممتعة أكتر من القراية على الجهاز

    بس تعرف المشكلة الأكبر فى اللى لا بيقرا على الجهاز ولا من كتاب ولا جرنان ومقضيها تضيع وقت وبس ودى مشكلة جااااااااامدة عايزالها موضوع تانى

    :))

    ردحذف
  3. طب وربناااا يا محمود كنت جايه اقوللك ابعتلى كتب التوحيد اللى عندك بس لاقيتك اوف لاين:)
    هتجيبهم برضه:D عارفاك كريم:))

    عارف انا اقتصرت قراياتى للكتب فى المترو
    لا وايه اليومين اللى فاتوا كنت رايحه مشوار عارفه انه هيبقى طويل وممل قولت مستحيل لازم الحق اخد اى كتاب معايا وكنت متاخره فمبصتش على عنوان الكتاب
    تخيل لما تكون مكتئب والكتاب اللى تتدبس تقراه لمدة ساعتين يبقى عنوانه دموع الجيوكنده:S:S:S
    بس فعلا القرايه وحستنى اووووى
    انا فاكرة من حوالى تلت سنين بابا كان بيزعقلى عشان كنت ببقى قاعدة فوسطالضيوف بكتاب ولااا كان فى حد هنا..
    دلوقتى..:S
    حاجة نيلة بجد! متعة الكتب الورقية مفيش زيها
    بس بما ان النت اللعنة دا مش قاجرين نستغنى عنه
    فنقضيها بى جى اف وامرنا لله..حلو التوبك جدا;)

    ردحذف
  4. البداية والنهاية في 14 يوم وسيرة بن هشام وصور من حياة الصحابة ورجال حول الرسول ... ( فعلاً ) ولا (بتحفز الناس)

    ردحذف
  5. أنا معاك يا محمود جدا في كلامك .. ليه بطلنا نقرأ؟!

    ردحذف
  6. ألاء : مهو الفكرة فكدة ... بطلنا نقرا وبنكسل وبقينا بدل مندور علي كتاب ... اسهل ندوس علي زرار الباور ونسترخي قدام الكمبيوتر ... والله القراية وحشتني جدا

    ردحذف
  7. بسمة : انا بتكلم علي الناس ال كانت بتقرا حتي ... وبطلت تقرا ... ال انا واحد منهم ... الموضوع التاني دة بقي عليكي انتي :D
    لو حد بيتفرج علي خواطر ... كان في حلقة فيها الشقيري كان بيقرا كتاب اسلامي قديم عن الساعات ... الكاتب بيقول ان المعرفة بالاوقات فرض كفاية علي المسلمين عشان كدة انا بذلت المجهود دة وقعدت 5 سنين عشان اكتب الكتاب دة .... والشقيري عيط ... صعب عليه اننا مستفدناش من العلم دة ... بيقول هنقولهم ايه لو صحيو دلوقت وسالونا عن علمهم ..

    هنقولهم ايه يا بسمة :(

    ردحذف
  8. برضه هتجيبلى كتب التوحيد يا محمود!

    ردحذف
  9. بسمة بهاء :
    هههههه صعبة عليكي كتب التوحيد دي ... ممكن ابعتلك الكتاب بتاع السمعيات ال كنا بنتكلم فيها دة ممكن تفهمي منة اكتر ... علي العموم نتكلم في الموضوع دة بعدين عشان انا ليا راي مش هينفع اقولة هنا :D

    والله يا بسمة كنت زيك ... وكمان مش لما يجلنا ضيوف لما نروحلهم ... يبقي معايا قصة او كتاب او اروح عند جدتي افتح المكتبة القديمة اطلع منها كتاب واقعد اقراه ويمكن بابا وماما يمشو وينزلو وانا قاعد مش دريان بالدنيا ... ياااااااااه كانت ايااام

    ردحذف
  10. غير معرف :

    لا مش اسبوع
    البداية والنهاية قريتة في اجازة 2 اعدادي ... خلصتة في اسبوع متواصل مش 14 يوم

    وخلال الاجازة دي برضة قريت الكتب ال قلت عليها وكتب تانية كتير

    كانت اكتر اجازة قريت فيها في حياتي كلها

    هههههههههههه وقرفت بابا وماما باني اقعد احكيلهم ال قريتة ... وخصوصا حقبة ما بعد عمر بن عبد العزيز وانهيار الدولة الاموية من بعده
    رحمه الله

    ياريت الناس بس تتحفز وتتشجع وتقرا خصوصا في التاريخ الاسلامي لانة ممتع وفيد جدااااااا

    او الكتب الاسلامية العلمية القديمة

    هتنبهر بجد باد ايه المسلمين كانو علمااااااااء

    ردحذف
  11. انا بحب اوى الشخصيات اللى بتحب القرايه لانهم بيزدادو ثقافه باستمرار

    بس انا لالاسف ماليش طولت بال على القرايه

    يعنى بحب اقرأ بس مش اى حاجه يعنى بحب الروايات القصص وحجات تانيه

    يعنى جربت قبل كده اقرأ كتب عن الناس زمان وكتاب اسمو 200 سنه حول العالم بلاقى نفسى مش بكمل قرايه الكتب اللى زى دى

    بزهق بسرعه او مبحسش بمتعه فى قرايتهااا


    شكرا يا محمود على تنبيهك اللى فى موضوع وحثك الناس على القرايه

    تقبل مرورى

    والسلام عليكم ورحمه الله وبركاته

    ردحذف
  12. الفكرة مش تجربة وبس
    مش لازم عشان معجبكيش كتاب يبقي انت معندكيش القدرة علي القراية
    كل واحد يقدر يقرا ولفترات طويلة كمان بس الفكرة انة يحب القراية ويلاقي الاسلوب ال يشدة ويقعدة بالعافية عشان يقرا

    ردحذف
  13. أبدأ دور على جوهر العلم .. لأن العالم بيتمتع بحوهر العلم أما المضمون فهو بيعرضه عشان الناس تستفيد بيه .. وقل... (ربي زدني علما).. وجوهر العلم كأنه لؤلؤ مكنون في صدف .. رحلة طويلة يمكن توصل .. والعجز عن الإدراك .. إدراك

    ردحذف
  14. المشكله ان لما بتطلع حاجه جديده .. بنجري عليها ونتعمق فيها اووي ونهجر الحاجه القديمه دي ونحاول نطلع فيها عيوب يعني نقول دي مش عمليه .. خلينا عصريين و ماشيين مع زمانا .. بس طبعا دا غلط المفروض اننا نتمسك بالحاجه الصح سواء جديد قديمه مش مهم .. ودا ينطبق تماما على موضوع القراءة انا شخصيا مابشوفش اي متعه في اني انزل كتاب على الكومبيوتر واقراه من خلاله .. لسه الكتاب هو متعتي .. بس ما انكرش بردو ان النت اخد وقت كتييير من حاجات كنت بعملها قبل كده .. وبحاول افتكر انا كنت بعمل ايه في وقت فراغي مش عارفه .. ودا لاني لما بتعمق في حاجه بنسى التانيه

    ردحذف
  15. جميل الموضوع والله يامحمود وبجد ايام القراءه دى كانت تحفه وفعلا كان الواحد ساعات بيحط القصه جوه الكتاب وكان حاسس ايامها انه بيخاطر عشان يعمل حاجه كده

    شكرا ع الموضوع الرائع يازعيم وع التذكره وان شاء الله نقرا حاجات تفيدنا وطبعا قران ف رمضان وغيره

    ومستنيين منك اكتر ان شاء الله

    ردحذف
  16. غير معرف : يرحمكم الله :D

    ردحذف
  17. افنان : التوافق مع التكنولوجيا حاجة حلوة ... لكن اننا نعيش عبيد للتكنولوجيا ... هو دة العيب بعينة

    النت فعلا قضي علي حجات كتير حلوة كنا بنعملها

    ردحذف
  18. ابوحميد : ههههههههههههه كلنا كنا بنعمل كدة

    يللا كانت ايااااااااااااام

    ياااااريتها ترجع

    ردحذف
  19. رائع كلامك محمودانا برغم الفيس والنت وكل الحاجات اللي قولتها بلاقي استمتاع رهييييييييييييييييييييييب في القراية وخصوصا الورق القديم الاصفر

    والحمدلله عندي لسة متعة جمع الاوراق والجرايد

    اللي بجد عاملة مكتبة صغيرة تحت السرير من الكتب والبلاوي وورق الجرايد وخلافه هههههههههههههههه


    وبقول لشهرياري قصدي المصطلح اللي بطلق علي الشخص اللي بتمني الزواج منه ان حاجات وورقي قصصات الجرايد

    وكتبي الصفراء قبلي في عش الزوجيةطبعا كلام في سركو(انا محتاجة دعوة 80مليون مصري )داخل وخارج مصر مع مراعاة فرق التوقيت ههههههههههههههه


    ادعولي انتوا بس

    بجد مش عارفة اسميها مقال ولانوت ولاتوبيك المهم انها حقيقة فعلية بتاثر علينا لاننا زمان لما كنا بنقراكنا بنعرف معاني اللغة العربية بشكل اعمق دلوقتي بحاول اشرح الكلمة اللي بقولها

    عشان النا ستفهم قصدي وياسلام بقي لو شرحتلها بمثيلتها في الانجليزي تلاقيها تتفهم اسرع


    يلالالالالالالالالالالالالالالالالالالالا بينا نرجع زي زمان نقرا ونستمتع بقرأية وخصوصا الكتب اللي بنقرأها قبل النوم علي الاباجورة الصغنونة في اوضتنا

    تسلم ايدك محمود

    هندشهرزاد

    ردحذف
  20. هههههههههههههههههه

    ربنا يقدملك ال فيه الخير يا شهرزاد

    جميل انك لسة محتفظة بالقراية كهواية اصيلة بالنسبالك

    غير بيندم عليها

    نورتي البوست

    ردحذف
  21. كلام تمام علفكره انا بطلت قرايه بعد الجواز بس بدات ارجع تانى وبقيت اخد الكتب للحمام واشقلب رجلى عالكنبه او اقره قبل ما انام واعيش فالعالم التانى واستفدت اوى ان الجهاز عندى كان بايظ واستغليت ده حقيقي بدات ارجع تانى لنفسي واحس بيها القرايه دى نعمه وفرض واجد والا مكنش ربنا ذكر اقرا وانزلها اول كلمة فى القران الكريم
    علشان نبقى احسن لازم نتعلم والعلم مش بس فالمدراس والجامعه العلم فالكتب
    هنتطور من جوانا وهنتحضر وهنبق احسن باذن الله اكيد
    بس نفسي اقره كتب فيها كلام كبير وابعد عن الروايات اكتر يمكن اتطور احسن
    ام احمد

    ردحذف