الخميس، 23 سبتمبر 2010

لـحياة هاديـة


عن علاقة الراجل بـمراته أو خطيبته هاتكلم
بعيـداً عن العلاقه الجنسيـه أو ما شابه

عندي معتقـدات بيـتهيألي هي إللي المفروض تخلي العلاقه دي تكون إلي حد ما ناجحه
رغم إنها حاجات صغيره .. إلا إن معظم الرجاله بيتغاضوا عنها أوقات كتير
متـحججين بإنهم مش فاضيين أو متدايقين .. أو أي حاجه من دي

المعتقدات دي بـتبدأ من :
- لازم يكون الراجل فاهم كويس جداً إنه بيتعامل مع كائن حساس (رفـقاً بالقوارير)
- يهتم بـكل تفصيله بـتقولها أياً كانت .. حتى لو حاجه تافـهه
- يعرف : هي بتحب إيه .. بتكره إيه .. مين الناس إللي بتحبهم ويحبهم عشانها
إيه الآماكن إللي بتحب تروحها ويخرجها فيها .. وهكـذا
- كل فتره يعمللها مفاجأه حلوه .. أو يجيبلها هديه .. حتى لو كانت وردة .. (بتفرق كتير)
- مش لازم عشان يبـين حبه ليها يـبالغ فيه .. (بتقلب بـخنقه وبيبقى زي طوق إتلف حوالين رقبتها .. ودي بدايه لمشاكل)
- مفيش أي وجهة نظر مقنعه أو سبب يبرر إنه : يهينها .. يقارن بينها وبين حد تاني
يزعق فيها .. يخلي سيرتها على لسان إللي يسوى وإللي مايسواش .. إلخ من الحاجات دي

و أخيراً وليس آخراً ... لإن أكيد فيه حاجات تانيه كتيره :
فيه حاجتين مهمين .. الآولى : متفاهم معاها وفيه حاجات مشتركه بينهم
وده بيساعد على التواصل جداً
التانيه : مشاركته وتشجيعه ليها بيأثر جداً .. عاطفياً بقى .. عملياً .. أياً كان يعني
المهم إن يكون فعلاً فيه مشاركه حقيقيه
حتى لو صحيت هي في يوم من الآيام ولقته محضر الفطار وجايبه جنبها ع السرير (لو متجوزين)
أو صحيت لقت وردة متسابه ليها منه (لو مخطوبين)
وغيره بقى...

بيتهـيألي الحاجات الصغيره .. بتخلي الحياه عظيمه وجميله


آلاء حلمي

هناك 11 تعليقًا:

  1. قبل م اقرا الجزء الاخير كنت هقولك بس بردو لازم يكون فى حجات مشتركه بينهم
    لان ده هيساعد ان علاقتهم تبقى اقوى .. كمان لازم يفتكرو لبعض الخير يعنى مش ديما فى الزعل متفتكرش منه غير الاسود بس ... لا .. لازم تفتكر ان كان فى ايام بيضه كمان ...
    جميل اوى الكلام ده يا الاء ...
    عجبانى :)

    ردحذف
  2. عاجبني اوي

    سعات الحجات الصغيرة دي بتفرق كتييييييير اوي

    ردحذف
  3. يا " كلام في الهوا"
    مابتكلمش عن ايام سوده وايام بيضه
    الحاجات دي المفروض تحصل من غير مايحصل زعل
    وبعدين لو بيحبها مستحيل هايزعلها
    فـبالتالي هي مش هاتزعله

    ومش معنى كده انه يشيل كل حاجه .. لأ
    بس يحتويها كويس .. يديها رعايه هاتديله حب

    ردحذف
  4. أيوا طبعاً يامحمود
    تفرق كتير

    ردحذف
  5. برافو يا الاء
    اسفة انى اتاخرت فى التعليق
    بس عاجبنى البوست دا جدا
    وعايزة اضيف ان فى حاجة بتخللى الدنيا تولع بينهم من غير قصد
    فى بداية الموضوع دا بيكون الراجل اتهتمامه زيادة جدا عشان يلفت نظرها
    ولما هى بتبتدى تحبه فعلا بتبقى مستنية منه اهتمام اكتر كمان..بس فى الوقت دا الراجل بيحس انه اطمن
    يعنى خلاص هى عرفت انى بحبها هافضل اعيد وازيد فكلام حلو ليه!
    خلاص هى عرفت انى بتعب عشانها او فى بالى على طول هفضل اتصل بيها ليه!
    ع النتاحية التانية بقى هى بتبقى فاهمة تراجع اهتمامه دا ترجمه لتراجع حبه ليها اصلا
    ودا طبيعى
    الست او البنت عندها اهم حاجة بتترجم الحب هو الاهتمام
    فحين ان الراجل اهم حاجة عنده هى الثقة
    طبعا الثقة مهمة بالنسبة للبنت بس مش فى المرتبة الاولى زى الاهتمام وهكذا بالنسبة للراجل
    ياريت يخللوا بالهم م الموضوع دا هيفرق وهيلخص مشاكل ملهاش لازمه كتير

    ردحذف
  6. كلامك جميل يا بوسي
    بس خلي بالك ..
    الموضوع ساعات بيبقى تحت مسمى " الآفوره " البايخه
    ودي حاجه ف حد ذاتها مش حلوه بالمره

    أهم حاجه الوسطيه في كل حاجه
    مش لازم اهتمام زايد
    ومش لازم اهتمام ناقص

    الاتنين ف كل الآحوال بيعملو مشكله

    ردحذف
  7. صح
    نحن امة وسطااا:D:D:D

    ردحذف
  8. كلامك جميل يا الاء ومفيش ولا حرف فيه غلط بس انته ليه اتكلمتي عن العلاقه من طرف واحد هو الولد ونسيتي تتكلمي عن الطرف التاني
    ليه البنت دايما بتنسي طبيعه الراجل ال ممكن يتعصب او يعلي صوته او الراجل ال بيغير
    ليه مبتحاولش بذكائها تتعامل مع الانسان ال بتحبه بمميزاته وعيوبه بدل متيعد عنه اكتر او ترد عليه باسلوب يكبر المشكله ال بنهم ف حين انه بسهوله ممكن تمتصه او تتعامل معاه كطفل صغير ووقتها بسهتكبر ف نظره اكتر وهتلاقي كل الحب والحنيه ال اتخلقوا ف الدنيا
    ليه مبتحاولش تسمعله وتفهم برضو الحاجات ال بتضايقه ومتكررهاش بدل متعند ووقتها يحس بعدم التقدير وده اصعب احساس ممكن الراجل يحسه من زوجته
    ع فكره يا الاء اصعب حاجه ف الدنيا ان الانسان يشوف نفسه دايما صح وميحاولش يتغير
    الحياه لازم فيها تفاهم وحب عشان نبقي عندنا استعداد نستحمل لكن لو كل طرف شاف الحاجه الوحشه بس فالحياه عمرها مهتستمر
    انا معاكي ف كل كلامك بس ياريت برضو يكون من الطرفين
    وف حاجه مهمه جدا _دايما البنت ال هيه الكائن الرقيق ال خلقه ربنا وال جواها الحب والحنان والمشاعر اكتر مستنيه الحاجه دي من الراجل باستمرار ف حين انها ممكن متكنش واخدها بالها اطلاقا ان الراجل برضو مستني يسمع الكلمه الرقيقه او الاهتمام والتقدير او موقف يثبتله انه كل حاجه ف حياه الانسانه ال اختارها تكون شريكه حياته
    ليه دايما بننسي الحاجات الجميله ال كانت ف حياتنا لمجرد انه عاش مرحله صعبه ومهما كان الطرفين غلطوا ف حق بعض فاكيد لو بيحبوا بعض هيستحملوا لكن ف النهايه يبعدوا فده القرار الصعب
    ع فكره احنا لو قربنا من دينا اكتر هنلاقي حاجات كتير فاهمنها غلط بين العلاقه بين الرجل وزوجته لو قدرنا نفهما ونطبقها فعلا صح هنستريح
    نصيحه بجد ياريت يا جماعه تسمعوا خطب الشيخ عبدالحميد كشك ومحمد حسين يعقوب عن العلاقه والمعامله الزوجيه ف الاسلام
    بجد بجد انا كنت فاهم حاجات كتييييييييير غلط بس الحمد لله اني عرفتها
    السلام خير ختام

    ردحذف
  9. أيوا يابوسي
    أهم حاجه الوسطيه ..
    كتر الآفوره وحش والله
    :)

    ردحذف
  10. كلام جميل جدا جدا .. 100 100
    بجد انا بيعجبنى وجهة نظرك و افكارك فى كل
    موضوع جديد بتكتبية

    ردحذف
  11. أنا أول مره أدخل المدونه
    ودا أول موضوع أقراه فيها
    وبصراحه عجبتينى يا آلاء فـ كلامك ده
    بس كان ناقص شويه
    لان فعلا أنا لاحظت لإن كلامك محايد إلى حد ما
    بس دا ماينفيش إن البوست مفيد برده
    بشكرك

    ردحذف